8-15-dekabr kúnleri aralıǵında paytaxtımız Nókis qalasında sporttıń voleybol túri boyınsha qızlar arasında XXIII Ózbekstan kubogı, sonday-aq, erkekler arasında XXVIII Ózbekstan kubogı jarısları bolıp ótti.

Qızlar arasında ótkerilgen jarısqa Qaraqalpaqstan Respublikası atınan Ájiniyaz atındaǵı Nókis mámleketlik pedagogikalıq institutınıń qızlar saylandı komandası qatnastı. Jarıs juwmaǵında Jizzaq wálayatı qızları 1-orındı iyelegen bolsa, maydan iyeleri esaplanǵan NMPI saylandı komandası qızları sıylı 2-orındı bántledi. 3-orın Úrgenish mámleketlik universiteti qızlarına nesip etti.

Áhmiyetlisi, Ájiniyaz atındaǵı Nókis mámleketlik pedagogikalıq institutınıń qızlar saylandı komandası aǵzalarınan A.Joldasbaeva, N.Reyimbaeva, U.Turǵanbaeva, sonday-aq, komanda bas treneri Azat Kazakov Ózbekstan saylandı komandası quramında usı jıldıń 20-dekabr kúni Bangladeshte bolıp ótetuǵın Aziya chempionatına qatnasatuǵın boldı.

Jarıs juwmaǵında saylandı komandamız bas treneri, sport veteranı Azat Kazakov «Ózbekstan kubogınıń eń jaqsı treneri» nominaciyası menen sıylıqlandı.

Esletip ótemiz, Ájiniyaz atındaǵı Nókis mámleketlik pedagogikalıq institutınıń qızlar saylandı komandası voleybol boyınsha usı jılǵı Ózbekstan superkubogınıń jeńimpazı esaplanadı.

Islam Matekov,
NMPI baspasóz xatkeri.