Paytaxtımız Nókis qalasında «Ózbekstan jasları forumı – 2021» hápteligi sheńberinde «Keleshek liderleri» forumı ótkerildi.

Ilajda Qaraqalpaqstan Respublikası Joqarǵı Keńesiniń Baslıǵı Murat Kamalov sózge shıǵıp, elimizdegi talantlı hám qábiletli jaslardı mámleketlik basqarıw jumıslarına qızıqtırıw, olardı watan súyiwshilik ruwxında tárbiyalawǵa qaratılǵan ilajlardı ámelge asırıw, kadrlar selekciyası arqalı aymaqlarda joqarı qánigeli mámleketlik puqaralıq xızmetkerlerdiń qatlamın hám jańa áwladlar arasınan úmitli kadrlardıń rezervin qáliplestiriwde «Keleshek liderleri» klubınıń ornı ayrıqsha ekenligin atap ótti. Keleshekte klub aǵzalarınıń hám jaslardıń óz bilimi jáne potencialı menen elimizdiń rawajlanıwına múnásip úles qosatuǵınına bekkem isenim bildirdi.

Forumda «Keleshek liderleri» klubınıń «Media» baǵdarı koordinatorı, NMPI shet tilleri fakulteti studenti Islam Dilmanov óziniń Qaraqalpaqstanda turizmdi rawajlandırıw hám elimizde onlayn bilimlendiriwdi rawajlandırıw boyınsha joybarın jıynalǵanlarǵa tanıstırdı.

Forum dawamında klubtıń belsendi aǵzası, NMPI pedagogika fakulteti studenti Dilbar Jumaniyazova klub aǵzası Álisher Fayzullaev penen jol-transport hádiyseleriniń aldın alıw hám olardı saplastırıw boyınsha startap joybarın usındı.

NMPI studentleri tárepinen usınıs etilgen joybarlar forum qatnasıwshılarında úlken qızıǵıwshılıq oyattı.

Forum sheńberinde ózleriniń baslama hám ideyaları menen joybarlar islep shıǵıp, bir qatar tańlawlarda jeńimpaz bolǵan, sonday-aq, túrli tarawlarda joqarı nátiyjelerge erisip atırǵan qábiletli jaslar qatarında klub aǵzası, NMPI magistrantı Allayar Dármenov sertifikat hám bahalı sawǵalar menen sıylıqlandı.