Búgin, 30-dekabr kúni erte tańda voleybol boyınsha Ózbekstan erkekler hám hayal-qızlar saylandı komandası aǵzaları Bangladeshten Tashkent qalasına qaytıp keldi. Olar Bangladeshtiń Dakka qalasında bolıp ótken CAVA, yaǵnıy Oraylıq Aziya voleybol associaciyası qáwenderliginde shólkemlestirilgen «Challenge CUP» jarısında jaqsı nátiyjelerge eristi.

Xalıqaralıq jarısta Ózbekstan hayal-qızlar saylandı komandası 2-orındı iyelep, gúmis medaldı qolǵa kirgizdi. Olar turnirde tek ǵana Nepal saylandı komandasınan jeńiliske ushıradı. Al basqa barlıq qarsılaslarına salıstırǵanda joqarı tájiriybe hám sport sheberligine iye ekenligin kórsetip, jeńislerge eristi.

Ózbekstan hayal-qızlar saylandı komandası quramında jarısqa qatnasqan qaraqalpaqstanlı sportshılar, Ájiniyaz atındaǵı Nókis mámleketlik pedagogikalıq institutınıń qızlar saylandı komandası aǵzaları A.Joldasbaeva, N.Reyimbaeva hám U.Turǵanbaeva saylandı komandamızdıń jeńislerine ózleriniń múnásip úleslerin qostı.

Qaraqalpaqstan qızlar saylandı komandası hám Ájiniyaz atındaǵı NMPI qızlar saylandı komandasınıń bas treneri, sport veteranı Azat Kazakov ta Bangladeshte ótkerilgen usı xalıqaralıq jarısta Ózbekstan saylandı komandası trenerleri quramında qatnasıp, óziniń kóp jıllıq tájiriybesi jáne jol-jobaları, taktikaları menen joqarı nátiyjelerdi qolǵa kirgiziwge úlken úles qostı.

Sonday-aq, jarısta Ózbekstan erkekler saylandı komandası da tabıslı qatnasıp, bronza medalın qolǵa kirgizdi.

Islam Matekov,
NMPI baspasóz xatkeri.