Áziz hám húrmetli watanlaslar!
Siz, ázizlerdi, kóp milletli pútkil xalqımızdı, Jańa – 2022-jıl menen shın júrekten qutlıqlayman. Usı quwanıshlı máwritlerde bársheńizge tınıshlıq-paraxatshılıq, bekkem densawlıq, baxıt-ıǵbal tileymen!
Búgin, Jańa jıl bosaǵasında turıp, ótip baratırǵan jıldan razı bolsaq, Jaratqanǵa hár qansha shúkirlik etsek, arzıydı.
«Jaslardı qollap-quwatlaw hám xalıqtıń salamatlıǵın bekkemlew jılı» turmısımızda jarqın iz qaldırmaqta. Jıl dawamında sizler menen birge úlken jumıslardı ámelge asırdıq.
Pandemiya hám globallıq daǵdarısqa qaramastan, elimizde joqarı ekonomikalıq ósiw támiyinlendi. Kóplegen kárxanalar, klaster hám texnoparkler, zamanagóy infrastrukturalıq tarmaqlar qurıldı.
Jańa turaq jaylar, baqsha hám mektepler, joqarı oqıw orınları hám emlewxanalar, mádeniyat hám sport obektleri paydalanıwǵa tapsırılmaqta.
Isbilermenlik háreketi, sonıń ishinde, hayal-qızlar hám jaslar isbilermenligi jedel rawajlanbaqta.
Diyqan hám fermerlerimiz pidayı miynet etip, bıyıl da mol zúráát jetistirdi.
Qala hám awıllarımız abat bolıp, Jańa Ózbekstannıń biytákirar kelbeti qáliplespekte.
Bilimli hám ǵayratlı jaslarımız úlken tabısları menen xalqımızdı jáne de quwanıshqa bólemekte. Elimizdiń xalıqaralıq abıroyı kún sayın artpaqta. Pursattan paydalanıp, sırt elli sheriklerimizdi, sırt mámleketlerdiń xalıqların Jańa jıl menen qutlıqlap, olardıń bárshesine tınıshlıq hám rawajlanıw tileymiz.

 

Áziz doslar!
Elimizde keń kólemli reformalarımız turaqlı dawam etpekte.
Olardı bunnan bılay da rawajlandırıw maqsetinde biz Jańa Ózbekstannıń Rawajlanıw strategiyasın islep shıqtıq.
Usı tiykarda «Insan qádiri ushın» degen ullı ideyanı ámelge asıramız.
Biz jańa jılǵa atama beriwde, keń jámiyetshiliktiń pikirlerin úyrendik. Áne sol usınıslardan kelip shıǵıp, men Jańa – 2022-jıldı elimizde «Insan qádirin ulıǵlaw hám belsendi máhálle jılı» dep járiyalawdı usınıs etemen.
Insan qádirin ulıǵlaw – elimizde jasap atırǵan hár bir adamnıń huqıq hám erkinliklerin, nızamlı máplerin támiyinlew bolıp esaplanadı.
Bul baǵdarda jámiyetimizdiń tiykarı bolǵan máhálle sheshiwshi orın tutadı.
Máhálle tınısh bolsa, el tınısh boladı.
Máhálle abat bolsa, mámleket abat boladı.
Sonlıqtan, bunnan keyin hár bir máhállede nátiyjeli is júrgiziw jumıslarımızdıń baslı ólshemine aylanadı.
Biybaha baylıǵımız bolǵan tınıshlıq hám turaqlılıqtı támiyinlewge úlken áhmiyet qaratamız.
2022-jılı ekonomikamız tarmaqların hám isbilermenlikti rawajlandırıw, jańa jumıs orınların jaratıw dıqqatımız orayında boladı.
Xalıqtıń dáramatların kóbeytiw, miynet haqı, pensiya, stipendiya hám napaqalar muǵdarın arttırıwǵa qaratılǵan áhmiyetli jumıslardı dawam ettiremiz.
Sociallıq tarawlar, ásirese, densawlıqtı saqlaw, tálim-tárbiya hám ilimdi rawajlandırıwǵa barlıq resurslar qaratıladı.
Húrmetli urıs hám miynet veteranların, áziz hayal-qızlarımız benen jaslarımızdı qollap-quwatlaw, járdemge mútáj insanlarǵa ǵamqorlıq kórsetiwge ayrıqsha itibar beremiz.
Elimizdi jáne de abat etiw, zamanagóy turaq jaylar, sonıń ishinde, barlıq aymaqlarımızda «Jańa Ózbekstan massivleri»n qurıw tiykarǵı wazıypalarımızdan biri boladı.
Xalqımızdıń turmısı jáne de abadan hám mazmunlı bolıwı ushın bar kúsh hám imkaniyatlarımızdı qaratamız, dep isendirip aytaman.

 

Áziz hám qádirli watanlaslarım!
Bársheńizdi Jańa – 2022-jıl menen jáne bir márte shın júregimnen qutlıqlayman!
Jańa jılımız qutlı hám bereketli kelsin!
Jası úlkenlerdiń ómirin, jaslarımızdıń kamalın bersin!
Gózzal hayal-qızlarımızǵa bárqulla baxıt-ıǵbal yar bolsın!
Elimiz tınısh, xalqımız aman bolsın!
Jańa jıl bárshemizge múbárek bolsın!

 

Shavkat Mirziyoyev,
Ózbekstan Respublikası Prezidenti.