Qádirli watanlaslar!
Áziz doslar!
Bársheńizdi ózinde ullı maqset hám eń jaqsı niyetlerdi jámlegen, xalqımızǵa ózgeshe quwanısh hám úmit baǵıshlap, úlken dóretiwshilik islerge ruwxlandırıp atırǵan Jańa jıl bayramı menen qızǵın qutlıqlayman.
Búgin xalqımız tınısh hám tatıw turmısta, erteńgi kúnge anıq maqsetler menen keleshekke isenimli qádem taslap barmaqta.
Ótip baratırǵan jıl elimizdiń jańa tariyxına óziniń umıtılmas tariyxıy waqıyaları, turmısımızdıń barlıq tarawlarındaǵı ózgerisleri hám jańalanıwları menen ajıralıp turatuǵın dáwir sıpatında jazılıp qalmaqta.
Ásirese, sońǵı jıllarda Húrmetli Prezidentimizdiń basshılıǵında barlıq tarawlarda reformalardıń tereńlesip barıwı, isbilermenlikti rawajlandırıw boyınsha jumıslardıń jáne de jedellesiwi, jaslar hám hayal-qızlardı qollap-quwatlaw máseleleriniń mámleketlik siyasat dárejesine kóterilgeni, járdemge mútáj insanlardıń qollap-quwatlanıwı, «Máhálle kesiminde» jumıs islew ámeliyatınıń jolǵa qoyılǵanı – bulardıń barlıǵı xalqımızdı turmıstan razı etiw baǵdarında ámelge asırılıp atırǵan iygilikli islerden sanaladı.
Izde qalıp baratırǵan «Jaslardı qollap-quwatlaw hám xalıqtıń salamatlıǵın bekkemlew jılı»nda xalqımızdıń iygiligi jolında xızmet etetuǵın bir qatar kárxanalardıń, sociallıq-mádeniy, infrastruktura hám basqa da obektlerdiń iske túsirilgenligin ayrıqsha qanaatlanıwshılıq penen atap ótiw orınlı. Sonıń ishinde, «Imzo» kompaniyası tárepinen Nókis qalasında plastikalıq ónimler islep shıǵaratuǵın kárxananıń iske túskeni, Taqıyatas rayonında medicinalıq diagnostika orayı hám tigiwshilik cexınıń ashılǵanı, Qaraqalpaqstan medicina institutı klinikasınıń paydalanıwǵa tapsırılǵanı, Ózbekstan mámleketlik konservatoriyası Nókis filialınıń ashılǵanı, Opera hám baqsıshılıq kórkem ónerine qánigelestirilgen mektep-internatınıń jumıs baslaǵanı, Qaraqalpaqstan awıl xojalıǵı hám agrotexnologiyalar institutınıń shólkemlestirilgeni, Nókis qalasında Shayx Xalifa bin Zoid Al Nahayan fondı tárepinen Hayallar hám balalar emlewxanası qurılıs jumıslarınıń baslanǵanı sıyaqlı kóplegen mısallar turmısımızda júz bergen quwanıshlı waqıyalar qatarına kiredi.
Mine, rawajlanıwdıń joqarı basqıshına kóterilip atırǵan Jańa Ózbekstanda Húrmetli Prezidentimizdiń basshılıǵında ótken qısqa waqıt ishinde barlıq aymaqlar qatarında Qaraqalpaqstan Respublikası da sociallıq-ekonomikalıq jaqtan jańasha rawajlanıw jolına túspekte. Eń shetki Qońırat, Moynaq, Qanlıkól, Taxtakópir hám Bozataw rayonlarında úlken dóretiwshilik isleri ámelge asırılıp atır.
Húrmetli Prezidentimizdiń 2020-jıl 11-noyabrdegi «2020-2023-jıllarda Qaraqalpaqstan Respublikasın kompleksli sociallıq-ekonomikalıq rawajlandırıw ilajları haqqında»ǵı arnawlı qararı tiykarında 2021-jıldıń ózinde jámi 9 trln. sumlıq 1 mıń 129 joybar iske túsirilip, 8 mıń 987 jańa jumıs ornı jaratılǵanın, sonday-aq, 1 mıń 347 joybardıń 10 trln. sumlıq investiciya qarjıları ózlestirilgenin ayrıqsha qanaatlanıwshılıq penen atap ótsek boladı.
Sonday-aq, juwmaqlanǵan jıldıń 23-noyabrinde Ózbekstan Respublikası Prezidentiniń «Aralboyı regionında isbilermenlikti jedel rawajlandırıwǵa baylanıslı qosımsha ilajlar haqqında»ǵı Pármanı menen isbilermenlerimizge bir qatar jeńillikler berilip, jańa imkaniyatlar jaratılmaqta.
Sonı da ayrıqsha atap ótiwimiz tiyis, 2021-jıldıń 18-may sánesinde bolıp ótken BMSh Bas Assambleyasınıń 75-sessiyasında «Aralboyı regionın ekologiyalıq innovaciyalar hám texnologiyalar aymaǵı» dep járiyalaw haqqında»ǵı arnawlı rezolyuciyasınıń qabıl etiliwi turmısımızda júz bergen tariyxıy waqıyalardan sanaladı.
Bul óz gezeginde qorshaǵan ortalıǵımızdı qorǵaw, xalqımızdıń salamatlıǵın bekkemlew, Aralboyı aymaǵında júzege kelgen mashqalalardı saplastırıw, xalıqtıń bántligin támiyinlew hám olardıń jasaw sharayatların jaqsılawda ayrıqsha orın tutatuǵın áhmiyetli hújjetlerden bolıp tabıladı.
Álbette, bunday keń kólemli jumıslar kewillerde maqtanısh sezimlerin oyatıw menen birge, insanlardı elimizde ámelge asırılıp atırǵan iygilikli islerge úles qosıwǵa ruwxlandıradı.

Qádirli watanlaslar!
Kirip kiyatırǵan Jańa jıl ózinde taǵı da joqarı maqset hám wazıypalardı jámlep, bársheni ullı islerge baslamaqta.
Jańa jılda da xalqımızdıń turmıs dárejesin jaqsılaw, olardıń bántligin támiyinlew, ásirese, kem támiyinlengen, járdemge mútáj shańaraqlarǵa járdem kórsetiw, jaslardı hám hayal-qızlardı qollap-quwatlaw, isbilermenlikti jedel rawajlandırıw sıyaqlı bir qatar máseleler tiykarǵı wazıypalarımızdan bolıp qala beredi.
Bayram aldınan jawǵan appaq qar haq kewilli xalqımızǵa baxıt, mol ırısqı-nesiybe, dáryamızǵa náwpir suwlar alıp kele bersin!
Sizlerdi jáne bir márte Jańa jıl bayramı menen qızǵın qutlıqlap, bársheńizge bekkem densawlıq, mol tabıslar tileymen!
Jańa jıl hár bir shańaraqqa amanlıq, bereket hám quwanısh alıp kelgey!
Elimiz tınısh, xalqımız hámiyshe aman bolsın!
Jańa jılıńız bársheńizge qutlı múbárek bolsın, áziz zamanlaslar!

M.Kamalov,
Qaraqalpaqstan Respublikası Joqarǵı Keńesiniń Baslıǵı.