Joqarı hám professional bilimlendiriw mákemeleri, akademiyalıq liceylerdiń student-oqıwshıları ushın qısqı dem alıs múddeti 2022-jıldıń 24-yanvarına shekem uzartıldı. Bul haqqında Joqarı hám orta arnawlı bilimlendiriw ministrligi xabar berdi.

Xabarda jazılıwınsha, 10-24-yanvar kúnleri aralıǵında finanslıq biyǵárezlikke erisken hám kredit-modul sistemasına ótken barlıq joqarı oqıw orınları basshıları menen professor-oqıtıwshıları ushın seminar-treningler ótkeriledi. Bul ilajlarǵa joqarı oqıw orınları janındaǵı barlıq professional bilimlendiriw mákemeleri hám akademiyalıq liceylerdiń basshıları da biriktiriledi.

Óz gezeginde, qısqı dem alıs dáwirinde student-oqıwshılardıń waqtın mazmunlı ótkeriw maqsetinde joqarı oqıw orınlarınıń rektorları menen birgelikte onlayn pán olimpiadaları, intellektual viktorinalar shólkemlestiriledi.

Student-oqıwshılarǵa óz úylerinen bilimlendiriw mákemelerine qaytıwına qolaylı sharayatlar jaratıw maqsetinde avia hám temir jol biletleri tarif bóliminen 50 procent muǵdarında shegirme beriliwi múddeti de 2022-jıldıń 24-yanvarına shekem uzartıldı.

2022-jıl 11-yanvarǵa shekemgi múddette satıp alınǵan avia hám temir jol biletleri biypul tárizde tiyisli múddetke almastırıp beriledi.

Xabarda jazılıwınsha, usı máselelerdi muwapıqlastırıw maqsetinde ministrlikte arnawlı shtab shólkemlestirilgen bolıp, barlıq shólkemlestiriw máseleleri boyınsha 1006, +99871 246-97-45, +99871 246-28-63 telefon nomerlerine múrájat etiw múmkin.

Islam Matekov,
Qaraqalpaqstan xabar agentligi.