ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Qabul 2024

Institut tyutorları tárepinen ámelge asırılǵan jumıslar hám aldaǵı wazıypalar dodalandı

Ájiniyaz atındaǵı Nókis mámleketlik pedagogikalıq institutında jumıs alıp barıp atırǵan tyutorlar tárepinen usı kúnge shekem ámelge asırılǵan jumıslar, búgingi kúnde studentlerdiń qısqı dem alıs waqtın mazmunlı ótkeriw máselesi hám aldaǵı wazıypalarǵa baǵıshlanǵan jıynalıs bolıp ótti.

Ilajdı instituttıń jaslar menen islesiw hám ruwxıy-aǵartıwshılıq isleri boyınsha prorektorı Q.Qadirov ashtı hám alıp bardı.

Atap ótilgenindey, Prezidentimizdiń «Ózbekstan Respublikası joqarı bilimlendiriw sistemasın 2030-jılǵa shekem rawajlandırıw koncepciyasın tastıyıqlaw haqqında»ǵı pármanı, Ministrler Kabinetiniń «Joqarı bilimlendiriw mákemelerinde bilimlendiriw procesin shólkemlestiriw menen baylanıslı sistemanı jetilistiriw ilajları haqqında»ǵı, sonday-aq, «Respublikalıq joqarı bilimlendiriw mákemelerinde studentlerdi turaq jay menen qamtıp alıw dárejesin arttırıw ilajları haqqında»ǵı qararlarında belgilengen wazıypalardan kelip shıǵıp institutta tyutorlıq jumısları jolǵa qoyıldı.

Búgingi kúnde instituttıń ulıwma 11 fakultetinde 48 tyutor jumıs alıp barmaqta. Olardıń barlıǵı da joqarı jumıs tájiriybesine iye pedagog kadrlar bolıp esaplanadı.

Jıynalısta instituttıń studentlerdi turaq jay menen támiyinlew jumısların muwapıqlastırıwshı bóliminiń baslıǵı Q.Sharipov tyutorlardıń jumısları boyınsha prezentaciya isledi.

Ótken jıldıń 16-oktyabr sánesinen jumıs baslaǵan tyutorlar tárepinen ijarada jasaytuǵın studentler menen baylanıslı ulıwma 74 qızıl aymaq anıqlanǵan bolsa, dekabr ayınıń sońına shekem olardı saplastırıw jumısları alıp barılıp, kórsetkish 14 ke túsirildi. Sonıń menen birge, ruwxıy-aǵartıwshılıq jumısları turaqlı túrde alıp barılmaqta. Ijarada jasaytuǵın studentlerge ijara tóleminiń bir bólegin mámleketlik byudjet qarjıları esabınan tólep beriw tártibine baylanıslı alıp barılǵan túsindiriw hám úgit-násiyat jumıslarınıń nátiyjesinde ulıwma 109 studenttiń ijara tólemleri tólep berildi.

Ilajda, sonday-aq, instituttıń jaslar menen islesiw hám ruwxıy-aǵartıwshılıq isleri boyınsha prorektorı Q.Qadirov qısqı dem alıs waqtında studentlerdiń bos waqıtların mazmunlı ótkeriw maqsetinde 29 bántten ibarat bolǵan is-ilajlar jobası islep shıǵılǵanlıǵın atap ótip, usı tiykarda házirgi waqıtta student-jaslar arasında ruwxıy-aǵartıwshılıq baǵdarındaǵı ilajlardı kúsheytiw, jınayatshılıq hám huqıqbuzarlıq jaǵdaylarınıń aldın alıw, tyutorlar arqalı olardıń ata-anaları menen turaqlı baylanısta bolıw sıyaqlı máseleler menen birge, 14-yanvar – Watan qorǵawshıları kúni múnásibeti menen onlayn tárizde videorolikler, plakatlar, qosıqlar tańlawları, onlayn pán olimpiadaları, shaxmat-shashka boyınsha onlayn jarıslar, Prezidentimizdiń «Jańa Ózbekstan strategiyası» kitabı tiykarında «Watanım rawajlanıwına óz úlesimdi qosaman» atamasındaǵı maqalalar tańlawı ótkerilip atırǵanın atap ótti.

Usı kúnge shekem studentler tárepinen videorolikler tańlawına 1134, plakatlar tańlawına 718, qosıqlar tańlawına 401, maqalalar tańlawına 978 dóretiwshilik jumısları kelip túskenligin málim etti.

Ótkerilip atırǵan tańlawlar, hár qıylı jarıslar hám pán olimpiadalarınıń nátiyjeleri boyınsha fakultetlerdiń dekanatları tárepinen toplanǵan barlıq materiallar tiyisli tártipte institut komissiyasına jiberiledi hám jeńimpazlar jáne sıylı orın iyeleri anıqlanıp, oqıw dáwiri baslanǵan waqıtta saltanatlı túrde sıylıqlanıwı jobalastırılǵan.

Jıynalısta aldaǵı waqıtlarda tyutorlar menen birgelikte ámelge asırılatuǵın jumıslar dodalanıp, bildirilgen pikir hám usınıslar tiykarında tiyisli jobalar belgilep alındı.

NMPI baspasóz xızmeti.