Usı jıldıń 17-yanvar kúni Ájiniyaz atındaǵı Nókis mámleketlik pedagogikalıq institutı student-jasları arasında onlayn tárizde «Zakovat» intellektual oyını ótkerildi.

Mámleketimizde ámelge asırılıp atırǵan keń kólemli reformalarda student-jaslardıń belsene qatnasıwın támiyinlew, joqarı mánawiyatlı, huqıqıy jaqtan sawatlı, erkin pikirleytuǵın jaslardı tárbiyalaw, jaslar arasında unamsız illetlerge qarsı gúresiw immunitetin qáliplestiriw, bos waqıtların mazmunlı ótkeriw jáne studentlerdiń intellektual bilimleri, logikalıq oylaw dárejesi, teoriyalıq hám ámeliy kónlikpelerin anıqlaw maqsetinde shólkemlestirilgen intellektual oyınǵa instituttıń barlıq fakultetleri, sırtqı bólimi hám magistratura bóliminde bilim alıp atırǵan studentlerden dúzilgen 13 komanda qatnastı.

Telegram sociallıq tarmaǵında shólkemlestirilgen onlayn intellektual oyın dawamında «Zakovat» intellektual klubı Qaraqalpaqstan Respublikası aymaqlıq koordinatorları tárepinen dúzilgen ulıwma 20 soraw oynalıp, hár bir komandanıń sorawlarǵa bergen juwapları arnawlı jumısshı topar hám tóreshiler quramı tárepinen tekserip barıldı.

20 sorawdan ibarat bolǵan oyında tábiyǵıy pánler fakulteti komandası 15 sorawǵa durıs juwap berip, sıylı 3-orındı bántlegen bolsa, ekinshi orın hám oyın jeńimpazın anıqlaw ushın sáykes túrde 16 balldan toplaǵan magistratura bólimi hám tariyx fakulteti komandalarına qosımsha soraw berildi.

Solay etip, qosımsha sorawǵa durıs juwap bergen magistratura bólimi komandası oyın jeńimpazı bolǵan bolsa, tariyx fakulteti komandası 2-orındı iyeledi.

Intellektual oyın jeńimpazı bolǵan magistratura bólimi komandasına kompyuter komplekti, 2-orındı iyelegen tariyx fakulteti komandasına noutbuk hám sıylı 3-orındı bántlegen tábiyǵıy pánler fakulteti komandasına planshet, sonday-aq, hár bir komandaǵa dárejeli diplomlar tapsırıladı.

NMPI baspasóz xızmeti.