ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Qaraqalpaqstandaǵı tariyxshı ilimpazlar hám professor-oqıtıwshılar Ernazar Alakóz haqqındaǵı jazılǵan pikirlerge qanday múnásibet bildirdi?

Usı jıldıń 21-yanvar kúni Berdaq atındaǵı Qaraqalpaq mámleketlik universitetinde respublikamızdaǵı joqarı oqıw orınlarınıń tariyxshı professor-oqıtıwshıları menen tariyxshı ilimpazlar qatnasıwında pikir alısıw bolıp ótti.

QMU baspasóz xızmetiniń xabar beriwinshe, ilajda Rustambek Shamsutdinov, Shodi Karimov, Uktamjon Ubaydullaevlar avtorlıǵındaǵı «Sharq» baspasında 2010-jılı hám keyingi nusqası 2016-jılı baspadan shıqqan «Vatan tarixi» oqıw qollanbasında ullı tariyxıy tulǵalarımızdıń biri bolǵan Ernazar Alakóz babamız tuwralı keltirilgen nadurıs pikirler tariyxshı ilimpazlar tárepinen talıqlandı.

Qaraqalpaqstan tariyxshı ilimpazları joqarıdaǵı máseleler boyınsha óz múnásibetin bildirip, qızǵın pikir alısıwlar boldı.

Bul kitapta tiykarsız jazılǵan pikirlerdiń hesh qanday tariyxıy dáreklerge tiykarlanbaǵanlıǵı, bul avtorlar qaraqalpaq xalıq batırı Ernazar Alakóz haqqında tolıq maǵlıwmatqa iye bolmastan, bildirilgen pikirler nadurıs ekenligin tariyxshı ilimpazlar dálillep, anıq maǵlıwmatlar menen atap ótti.

Pikir alısıwda bir qatar usınıslar berildi:

«Vatan tarixi» qollanbası avtorlarına Ernazar Alakóz haqqında bildirilgen pikirlerin qayta kórip shıǵıw hám usı pikirlerin tariyxıy hújjetlerge tiykarlanǵan halda saplastırıw;

Qaraqalpaqstan Respublikasındaǵı barlıq joqarı oqıw orınlarında usı avtorlardıń «Vatan tarixi» qollanbasın oqıtıw procesi, sonday-aq, kitap hám onıń elektron versiyasın málimleme-resurs oraylarınan alıp taslanıwı usınıs etildi.

Sonday-aq, pikir alısıwda Ózbekstan Respublikası joqarı oqıw orınları boyınsha tariyx páninen jańadan oqıw qollanbaların tayarlawda respublikamızdaǵı tariyxshı professor-oqıtıwshılar hám ilimpazlar belsene qatnasıp, óz pikirlerin berip barıwı kerek ekenligi de kórsetip ótildi.

Maǵlıwmat ornında atap ótiw kerek, 2010-jılı baspadan shıǵıp, joqarı oqıw orınları, universitetler hám pedagogikalıq institutlardıń tariyx fakultetleri ushın islep shıǵılǵan «Vatan tarixi» kitabınıń ekinshi basılımında qaraqalpaq xalıq batırı Ernazar Alakózge «Qozǵalańnıń basında qaraqalpaq biylerinen Alakóz laqaplı Ernazar degen shaxs turǵan. Ol ázelden jawız hám hádden tıs ishi qara shaxs bolǵan» dep táriyp berilgenligi sociallıq tarmaqlarda keskin pikir-talaslarǵa, narazılıqlarǵa sebep bolǵan edi.