Usı jıldıń 14-fevral kúni Qaraqalpaqstan Respublikası Joqarǵı Keńesiniń «Húrmet jarlıǵı»nıń iyesi, bilimlendiriw, tálim-tárbiya hám ilim pidayısı, belgili filosof, tájiriybeli ustaz Adilbek Turebekov 76 jasında qaytıs boldı.

A.Turebekov 1946-jılı Moynaq rayonında tuwıldı. Ol orta mektepti tabıslı tamamlaǵannan soń, 1963-jılı óziniń dáslepki miynet jolın Moynaq balıq zavodında jumısshı bolıp islewden basladı.

1965-1970-jılları Tashkent mámleketlik universitetiniń Tariyx fakultetiniń filosofiya qánigeligine oqıwǵa túsedi. Universitetti tabıslı tamamlap kelgennen soń, 1970-jılı N.Dáwqaraev atındaǵı Tariyx, til hám ádebiyat institutına kishi ilimiy xızmetker bolıp jumısqa jaylasadı. 1970-1972-jılları burınǵı SSSR Qurallı kúshleri qatarına shaqırılıp, áskeriy minnetin ótep keledi. Áskeriy xızmetten kelgennen keyin 1972-1974-jılları Shevchenko atındaǵı mektepte muǵallim bolıp jumıs isleydi. 1974-1976-jılları Moynaq rayonlıq «Bilim» jámiyetlik shólkeminde xatker bolıp miynet etedi. 1976-1980-jılları Ózbekstan KP Moynaq rayonlıq partiya komitetiniń úgit-násiyatlaw bóliminiń baslıǵınıń orınbasarı lawazımında miynet etedi. 1980-1984-jılları Nókis «Bilim» jámiyetlik shólkeminiń juwaplı xatkeri, Qaraqalpaqstan bóliminiń juwaplı xatkeri, respublikalıq jámiyetlik shólkemi baslıǵı orınbasarı bolıp saylanadı. 1984-1985-jılları Qaraqalpaqstan oblastlıq partiya komitetiniń lektorı lawazımında jumıs isleydi. 1985-1990-jılları Ózbekstan KP Nókis qalalıq úgit-násiyatlaw bólimi baslıǵı, «Nókis haqıyqatı», «Nukusskaya pravda» gazetalarınıń bas redaktorı, 1990-1992-jılları Nókis qalalıq Xalıq deputatları keńesi baslıǵınıń orınbasarı, Nókis qalalıq hákimiyatınıń sekretariat baslıǵı lawazımlarında miynet etken. 1992-1998-jılları aralıǵında Nókis qalalıq Xalıq bilimlendiriw bólimine qaraslı 19-sanlı mektep direktorı lawazımında miynet jolın dawam ettirdi.

1998-2016-jıllar Ájiniyaz atındaǵı Nókis mámleketlik pedagogikalıq institutı Siyasattanıw kafedrası oqıtıwshısı, aǵa oqıtıwshısı lawazımlarında miynet etti.

A.Turebekov pútkil sanalı ómiri dawamında xalıq xojalıǵı tarawların rawajlandırıwǵa hám onı keńnen úgit-násiyatlawǵa, maman kadrlardı tayarlawǵa, talantlı jaslardı tárbiyalawǵa hám olardı qollap-quwatlawǵa, respublika kóleminde hár qıylı ilajlardı shólkemlestiriwge óziniń salmaqlı úlesin qostı.

Ol qay jerde, qanday lawazımda islese de ózin miynetsúygish, kishipeyil, respublikanı rawajlandırıwday iygilikli islerdiń haqıyqıy jankúyeri, tájiriybeli ustaz sıpatında tanıta bildi hám keń jámiyetshilik arasında úlken abıroyǵa eristi.

Respublikanıń xalıq xojalıǵın rawajlandırıw jolında ayanbay miynet etken qádirdan insan, ádiwli ustaz Adilbek Turebekovtıń jarqın esteligi xalqımızdıń yadında máńgi saqlanıp qaladı.

Ájiniyaz atındaǵı Nókis mámleketlik pedagogikalıq institutı jámááti.