ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Qaraqalpaqstanlı studentler Joqarı hám orta arnawlı bilimlendiriw ministrine qanday usınıslar bildirdi?

Búgin, 21-fevral kúni Ózbekstan Respublikası Joqarı hám orta arnawlı bilimlendiriw ministri Abduqodir Toshqulov Qaraqalpaqstanǵa keldi. Ministr Qaraqalpaq mámleketlik universiteti mádeniyat sarayında universitet hám Nókis mámleketlik pedagogikalıq institutı student-jasları menen ashıq sáwbetlesiw ótkerdi.

Shın júrekten, jaslarǵa say tárizde erkin hám ashıq-aydınlıq ruwxında ótken sáwbetlesiw dawamında qaraqalpaqstanlı studentler ministr A.Toshqulovqa joqarı bilimlendiriw sistemasında bilim beriwdi sapalıq jaqtan joqarı basqıshqa kóteriw, shet tillerin úyreniw, xalıqaralıq tańlawlar, grantlar, pán olimpiadalarında qatnasıw, akademiyalıq almasıw baǵdarlamaların kóbeytiw baǵdarındaǵı ózleriniń pikir hám usınısların bildirdi.

Atap aytqanda, QMU yuridika fakultetiniń studenti J.Turdımuratov yuridika baǵdarında oqıp atırǵan studentlerdi usı baǵdardaǵı jetekshi joqarı oqıw orınlarında akademiyalıq almasıwdı jolǵa qoyıw, oqıw baǵdarlamaların birdey etip islep shıǵıw, NMPI shet tilleri fakulteti studenti G.Joldasbaeva jaslardıń shet tillerin tereń úyreniwi ushın ámelge asırıp atırǵan joybarı tiykarında metodist kadrlardı kóbeytiw, NMPI studenti N.Nurniyazov xalıqaralıq reytingi joqarı joqarı bilimlendiriw mákemeleri menen studentlerdi almasıw baǵdarlaması tiykarında grantlardı kóbeytiw, QMU jurnalistika tálim baǵdarınıń studenti L.Turaeva qızlar ushın óz aldına pán olimpiadaların shólkemlestiriw, NMPI shet tilleri fakulteti studenti, Prezident stipendiatı M.Mubarakov rus tili hám ádebiyatı tálim baǵdarına oqıwǵa qabıllawda tek ǵana test emes, sáwbetlesiw tiykarında qabıllawdı jolǵa qoyıw, QMU tariyx fakultetiniń studenti A.Turdıbaev joqarı oqıw orınlarında Qaraqalpaqstan tariyxı páni boyınsha ótiletuǵın saatlar sanın kóbeytiw sıyaqlı usınıslardı bildirdi.

 

Sonıń menen birge, jaslar tárepinen mektepler, orta arnawlı bilimlendiriw mákemeleri oqıwshıları ushın da mámleketlik stipendiyalar engiziw, jurnalistika, arxitektura sıyaqlı ámeliyatqa baǵdarlanǵan tálim baǵdarlarında ámeliy shınıǵıwlardı kóbeytiw, sport inventarların zamanagóy talaplar tiykarında studentlerdiń paydalanıwı ushın ele de kóbeytiw, mádeniyat hám kórkem óner tarawlarında student-jaslardıń xalıqaralıq tańlawlarǵa qatnasıwı ushın imkaniyatlar jaratıw, muzıkalıq ásbaplar menen jeterli muǵdarda támiyinlew, biypul Wi-Fi, Book Cafe sıyaqlı zamanagóy usıldaǵı oraylardı kóbeytiw, studentlerdiń uzaq aymaqlarǵa shıǵatuǵın ámeliyat processleriniń qárejetlerin qaplap beriw, mámleketlik grant hám tólemli kontrakt tiykarında oqıp atırǵan studentlerdi sabaqlardan úlgeriwine qarap, hár semestrde orınların almastırǵan halda oqıtıwdı jolǵa qoyıw sıyaqlı máseleler boyınsha pikirlerin bildirip, tarawda orın alıp atırǵan bazı kemshiliklerdi atap ótti hám jaslar olardıń sheshimleri boyınsha óz usınısların bildirdi.

Óz gezeginde, ministr A.Toshqulov jaslar menen ashıq sáwbetlesiw dawamında búginnen baslap jaslar turmısında úlken ózgerisler, jańalıqlar bolatuǵınlıǵın atap ótip, tarawdaǵı kútilip atırǵan sońǵı ózgerisler haqqında maǵlıwmatlar berdi. Atap aytqanda, bunnan bılay magistraturaǵa hújjet tapsırıwda shet tilin biliw boyınsha xalıqaralıq sertifikat bolıwı kerekligi, qánigelik pánnen imtixan alınbastan, shet tilin biliw boyınsha xalıqaralıq sertifikat balı menen bakalavr dáwirindegi qánigelik pánlerdiń ortasha balı esapqa alınatuǵınlıǵı, sonday-aq, magistraturaǵa kontrakt tiykarında qosımsha qabıllawdı ámelge asırıwdı joqarı oqıw orınlarınıń ózleri belgileytuǵınlıǵı, pedagogika tálim baǵdarlarında oqıp atırǵan studentler 2-kurs waqtınan baslap óz baǵdarları boyınsha mekteplerde jumıs islewi múmkin ekenligin málim etti.

Abduqodir Toshqulov qaraqalpaqstanlı jaslar ázelden óziniń ilim-bilimge bolǵan ayrıqsha talpınısları menen ajıralıp turatuǵınlıǵın atap ótip, jaslar tárepinen bildirilgen pikirler hám usınıslardıń barlıǵı orınlı ekenligin, bulardıń barlıǵı basqıshpa-basqısh túrde sheshimin tabatuǵınlıǵın jáne bular boyınsha tiyisli juwapkerlerge tapsırmalar beriletuǵınlıǵın málim etti.

Islam Matekov,
NMPI baspasóz xatkeri.