ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Joqarı hám orta arnawlı bilimlendiriw ministri hám Xalıq bilimlendiriw ministri NMPIge keldi

Búgin, 24-fevral kúni Ózbekstan Respublikası Joqarı hám orta arnawlı bilimlendiriw ministri Abduqodir Toshqulov hám Ózbekstan Respublikası Xalıq bilimlendiriw ministri Baxtiyor Saidov Ájiniyaz atındaǵı Nókis mámleketlik pedagogikalıq institutına keldi.

Qaraqalpaqstan Respublikası Xalıq bilimlendiriw ministri R.Reymov, Nókis mámleketlik pedagogikalıq institutı rektorı B.Otemuratov hám Qaraqalpaq mámleketlik universiteti rektorı A.Reymov, Qaraqalpaqstan Respublikası Xalıq bilimlendiriw xızmetkerlerin qayta tayarlaw hám qánigeligin arttırıw aymaqlıq orayı direktorı B.Dilanov, joqarı oqıw orınları prorektorları, fakultet dekanları, kafedra baslıqları, professor-oqıtıwshılar qatnasqan ushırasıwda Ózbekstan Respublikası Xalıq bilimlendiriw ministrliginiń qánigeleri usı jıldıń mart ayınan baslap Qaraqalpaqstan Respublikasındaǵı mekteplerde jumıs alıp barıp atırǵan pedagog-xızmetkerlerdiń qánigeligin jetilistiriw boyınsha ámelge asırılatuǵın jumıslarǵa toqtaldı.

Mart ayınan baslap Ózbekstan kóleminde birinshilerden bolıp Qaraqalpaqstandaǵı xalıq bilimlendiriw tarawı pedagoglarınıń bilim hám tájiriybesin arttırıw maqsetinde Bozataw hám Beruniy rayonlarındaǵı mekteplerde NMPI menen QMUdıń tájiriybeli professor-oqıtıwshıların biriktirgen halda mobil metodikalıq toparlardıń jumısların jolǵa qoyıw boyınsha jumıslar belgilenip alındı. Mobil metodikalıq toparlarǵa tikkeley JOO rektorları basshı etip bekitilip, hár bir topar bir ayda eki mektep jámááti menen mánzilli tiykarda jumıs alıp baradı, yaǵnıy pedagoglar ushın eki háptelik intensiv oqıwlar shólkemlestiriledi. Mektep jámáátiniń bilimine qaray mobil metodikalıq topardıń jumısları bahalanadı.

Atap ótilgenindey, házirgi waqıtta Qaraqalpaqstandaǵı mekteplerde orta arnawlı maǵlıwmatqa iye 2619, ulıwma kategoriyaǵa iye bolmaǵan 18 721 pedagog jumıs alıp barmaqta. Bul ilajlar arqalı «Úzliksiz kásiplik bilimlendiriw» platforması arqalı 7 kompetenciya boyınsha muǵallimlerdiń tájiriybesi arttırıladı.

Ushırasıwda Ózbekstan Respublikası Joqarı hám orta arnawlı bilimlendiriw ministri Abduqodir Toshqulov hám Ózbekstan Respublikası Xalıq bilimlendiriw ministri Baxtiyor Saidov, joqarı oqıw orınları rektorları sózge shıǵıp, xalıq bilimlendiriw hám joqarı bilimlendiriw ministrligi bárqulla usınday birge islesiwdi dawam ettiriwin atap ótip, bunıń nátiyjesinde sistemada orın alıp atırǵan ayırım kemshilikler saplastırılıwına erisiw múmkinligin atap ótti.

Ushırasıw óz ara pikir alısıwlar menen dawam etti.

NMPI baspasóz xızmeti.