Nókis qalalıq Xalıq bilimlendiriw bólimine qaraslı 27-sanlı ulıwma bilim beriw mektebinde Ózbekstan xalıq shayırı Zulfiya Israilovanıń tuwılǵanına 107 jıl tolıwı múnásibeti menen «Báhár keldi seni saǵınıp!» atamasındaǵı ruwxıy-aǵartıwshılıq ilajı shólkemlestirildi.

Onda Respublikalıq Ruwxıylıq hám aǵartıwshılıq orayı Qaraqalpaqstan bólimi qánigeleri, Ájiniyaz atındaǵı Nókis mámleketlik pedagogikalıq institutınıń student-jasları, oqıtıwshı hám oqıwshılar qatnastı.

Ilajda Oray Qaraqalpaqstan bólminiń qánigesi, shayır Sh.Ayapov, Nókis mámleketlik pedagogikalıq institutınıń oqıtıwshısı A.Abatov hám mektep direktorı F.Biysenovalar Zulfiya Isroilovanıń ómiri hám dóretiwshiligi haqqında shıǵıp sóyledi.

Atap ótilgenindey, ózbek hám qaraqalpaq ádebiyatında tanıqlı shayıra hám jámiyetlik ǵayratker Zulfiyanıń dóretiwshiligi oǵada áhmiyetli orın iyeleydi. Shayıranıń Ana-Watan, doslıq, muhabbat hám insan qádir-qımbatı menen suwǵarılǵan poeziyalıq shıǵarmalarınıń ósip kiyatırǵan jas áwladtıń ruwxıy dúnyasın bayıtıwdaǵı tásiri oǵada kúshli. Sońǵı jıllarda pútkil ómirin ózbek ádebiyatına baǵıshlaǵan ustaz dóretiwshiniń qunlı dóretpelerin keńnen úgit-násiyatlaw hám onıń tulǵasın máńgilestiriw boyınsha kólemli ilajlar ámelge asırıldı.

Ilajdıń sońǵı bóliminde jıynalǵanlarǵa Nókis mámleketlik pedagogikalıq institutınıń student jaslarınıń mektep oqıwshıları menen birgelikte Zulfiya dóretiwshiligine baylanıslı tayarlaǵan mádeniy-ruwxıy ilajı usınıldı.

Zulfiya qosıqların obrazlı atqarıw, hár qıylı saxnalıq kórinisler jáne mektep foesinde shólkemlestirilgen jas xudojnikler hám ónerli balalar kórgizbesi jıynalǵanlar menen mektep oqıwshılarına joqarı ruwxıy zawıq baǵıshladı.

Ilaj sońında ruwxıy-aǵartıwshılıq ushırasıwdı shólkemlestiriwde belsene qatnasqan bir qatar talantlı oqıwshılar Oraydıń Qaraqalpaqstan bólimi tárepinen kitaplar hám Húrmet jarlıǵı menen sıylıqlandı.

V.Uteshova,
Mektep direktorınıń ruwxıy-aǵartıwshılıq isleri boyınsha orınbasarı.