ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Institutta Oliy Majlis hám Joqarǵı Keńes deputatları menen ushırasıw bolıp ótti

Búgin, 26-fevral kúni Ájiniyaz atındaǵı Nókis mámleketlik pedagogikalıq institutında Ózbekstan Respublikası Oliy Majlisi Nızamshılıq palatasınıń deputatı Muxtar Ibragimov hám Isbilermenler háreketi – Ózbekstan Liberal-demokratiyalıq partiyası Qaraqalpaqstan Respublikalıq Keńesi apparat baslıǵı, Joqarǵı Keńes deputatı Sharapat Ótemisov penen ushırasıw bolıp ótti.

Ushırasıwǵa institut professor-oqıtıwshıları, tyutorlar hám student-jaslar qatnastı.

Ilajdı instituttıń jaslar máseleleri hám ruwxıy-aǵartıwshılıq isleri boyınsha prorektorı Q.Qodirov basqarıp bardı.

Ushırasıwda sózge shıqqan deputatlar sońǵı jıllarda ámelge asırılǵan reformalardıń nátiyjesinde elimizde Jańa Ózbekstandı qurıwdıń zárúr siyasiy-huqıqıy, sociallıq-ekonomikalıq hám ilimiy-aǵartıwshılıq tiykarları jaratılǵanın atap ótti.

Sóz etilgenindey, sońǵı jılları «Insan qádiri ushın» principi tiykarında xalqımızdıń abadanlıǵın bunnan bılay da arttırıw, ekonomikalıq tarmaqlardı transformaciyalaw hám isbilermenlikti jedel pátlerde rawajlandırıw, insan huqıqları hám máplerin sózsiz támiyinlew jáne belsendi puqaralıq jámiyetin qáliplestiriwge baǵdarlanǵan reformalardıń tiykarǵı baǵdarları belgilep alındı.

Keń jámiyetshiliktiń dodalawı nátiyjesinde «Háreketler strategiyasınan – Rawajlanıw strategiyasına qaray» principi tiykarında islep shıǵılǵan jeti tiykarǵı baǵdardan ibarat 2022-2026-jıllarǵa mólsherlengen Jańa Ózbekstannıń rawajlanıw strategiyası, sonday-aq, onı «Insan qádirin ulıǵlaw hám belsendi máhálle jılı»nda ámelge asırıwǵa baylanıslı mámleketlik baǵdarlama tastıyıqlandı.

Ushırasıwda Jańa Ózbekstannıń rawajlanıw strategiyasında belgilep berilgen maqsetler, olardıń mazmunı hám áhmiyeti haqqında jıynalǵanlarǵa maǵlıwmatlar berildi.

Ilaj dawamında student-jaslar Rawajlanıw strategiyasınan kelip shıǵıp ámelge asırılatuǵın jumıslar, ásirese, mektepke shekemgi, ulıwma bilim beriw, joqarı hám onnan keyingi bilimlendiriwdi jańa basqıshqa kóteriw baǵdarında alıp barılatuǵın reformalar boyınsha ózlerin qızıqtırǵan sorawlarǵa deputatlar tárepinen tolıq juwaplar aldı.

Ushırasıw sońında deputatlar Ózbekstan Respublikası Prezidenti Shavkat Mirziyoevtiń «Jańa Ózbekstan strategiyası» atamasındaǵı kitabın institut málimleme-resurs orayına sawǵa etti.

Islam Matekov,
NMPI baspasóz xatkeri.
Avtordıń túsirgen fotoları.