1-mart – ózbek xalqınıń súyikli shayırı, belgili jámiyetlik ǵayratker, Ózbekstan xalıq shayırı Zulfiya Israilova dúnyaǵa kelgen kún.

Sáne múnásibeti menen Ájiniyaz atındaǵı Nókis mámleketlik pedagogikalıq institutında Hayal-qızlar másláhát keńesiniń shólkemlestiriwinde «Báhár keldi seni saǵınıp» atamasında Zulfiya atındaǵı mámleketlik sıylıqtıń laureatları bolǵan qaraqalpaqstanlı qızlar menen ushırasıw keshesi bolıp ótti.

Ushırasıwǵa professor-oqıtıwshılar, tyutorlar hám student-jaslar qatnastı.

Kesheni institut rektorınıń hayal-qızlar máseleleri boyınsha másláhátshisi S.Bekchanova basqarıp bardı.

Ushırasıwda Zulfiya atındaǵı mámleketlik sıylıqtıń laureatları – Ózbekstan mámleketlik kórkem óner hám mádeniyat institutı Nókis filialı docenti, «Doslıq» ordeniniń iyesi Gúlbáhár Aqımbetova, Qaraqalpaq mámleketlik universiteti jurnalistika kafedrasınıń oqıtıwshısı Aysholpan Orazımbetova, «PR Company» interer dizayn kompaniyası qánigesi Biybinaz Qayıpova, QR Ishki isler ministrligi xızmetkeri Sapura Qayıpnazarovalar belgili hám talantlı ózbek shayırı, sheber xudojnik, ápiwayı insan qálbin tereńnen sezine alǵan dóretiwshi Zulfiya Israilova poeziyası biziń jasap turǵan dáwirimizdiń ózine tánliginiń jarqın kórinisi ekenligin atap ótti.

Zulfiya dóretiwshiliginde hayal-qızlar táǵdiri tiykarǵı orındı iyelep, onıń mámleketlik turmıstaǵı ornı úlken áhmiyetke iye ekenligin sáwlelendiredi. Talantlı shayır hám jazıwshı, insan kewil sezimleriniń bilimdanı bolǵan Zulfiya túrli janrlarda shıǵarmalar dóretken.

Ushırasıwda mámleketlik sıylıqtıń laureatları Zulfiya sıylıǵın alıwdaǵı islegen miynetleri, dóretiwshiligi, házirgi waqıtta ámelge asırıp atırǵan jumısları haqqında qatnasıwshılarǵa maǵlıwmatlar berdi.

Keshe dawamında student-jaslar shayır Zulfiyanıń qálemine tiyisli qosıqlardan úzindiler oqıp berdi.

NMPI baspasóz xızmeti.