ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Qabul 2024

Student-qızlar arasında tańlaw bolıp ótti

Ájiniyaz atındaǵı Nókis mámleketlik pedagogikalıq institutında Ózbekstan xalıq shayırı Zulfiya Israilovanıń dúnyaǵa kelgenine 107 jıl tolıwı hám jaqınlasıp kiyatırǵan Xalıqaralıq hayal-qızlar kúni múnásibeti menen shet tilleri fakultetinde oqıp atırǵan student-qızlar arasında «Qánekey, qızlar!» atamasındaǵı tańlaw bolıp ótti.

Tańlawdıń ashılıw máresiminde Qaraqalpaqstan Respublikasına miyneti sińgen mádeniyat xızmetkeri, «Doslıq» ordeni iyesi, shayır Gúlistan Dáwletova sózge shıǵıp, talantlı shayır hám jazıwshı, insan kewil sezimleriniń bilimdanı bolǵan Zulfiya Israilova dóretiwshiliginde hayal-qızlar táǵdiri tiykarǵı orındı iyelep, onıń mámleketlik turmıstaǵı ornı úlken áhmiyetke iye ekenligin sáwlelendiretuǵınlıǵı hám ol túrli janrlarda shıǵarmalar dóretkenligin atap ótip, óziniń shayırǵa arnap jazǵan qosıǵın oqıp berdi.

Tańlaw qatnasıwshıları sálemnama hám ózlerin tanıstırıw, asxanada mazalı taǵamlar hám báhár máwsimine say paydalı salatlar tayarlaw, kórkem-ádebiy hám ilimiy kitaplar, shıǵarmalar boyınsha soraw-juwaplar, sonday-aq, óz qábiletin kórsetiw sıyaqlı shártler tiykarında ózleriniń epshilligi, shaqqanlıǵı, bilim dárejesin sınaqtan ótkerdi.

Qızlardıń tańlaw shártleri boyınsha qatnasıwın tóreshiler quramı aǵzaları ádil túrde bahalap bardı.

Sonıń menen birge, ilaj sheńberinde institut jámááti tárepinen paytaxtımızdaǵı «Kók ózek» mákan puqaralar jıyını aymaǵında jasaytuǵın jasıúlken apalarǵa, oqıwda, jámiyetlik jumıslarda, respublikalıq hám xalıqaralıq sport jáne basqa jarıslarda sıylı orınlardı iyelegen sportshı qızlarǵa, olardıń ata-analarına Xalıqaralıq hayal-qızlar kúni bayramı múnásibeti menen bayram sawǵaları, minnetdarshılıq xatları tapsırıldı.

Ilaj talantlı studentlerdiń koncert baǵdarlaması menen dawam etti.

NMPI baspasóz xızmeti.