Ázelden hayal-qızlarǵa húrmet kórsetiw hám ǵamqorlıq etiw milliy qádiriyatlarımızdıń ajıralmas bir bólegi bolıp esaplanadı.

Hayal-qızlar biykarǵa jasarıw hám jańalanıw paslı – báhárge teńelmeydi. Óytkeni, olar ómirimizdiń mazmunı, shańaraǵımızdıń uytqısı, keleshek áwladlarımızdıń tárbiyashısı, tiregi bolıp tabıladı. Elimizde gózzal, erk-ıqrarlı, isbilermen, qábiletli, miynetkesh hayal-qızlar bárqulla itibarda bolıp, húrmetke bólenbekte.

Ájiniyaz atındaǵı Nókis mámleketlik pedagogikalıq institutında 8-mart – Xalıqaralıq hayal-qızlar kúni bayramı múnásibeti menen instituttıń ilimiy-pedagogikalıq, tarawlıq jumıslarında ayanbay miynet etip, erler menen teńdey islep, kópshilikke órnek bolıp kiyatırǵan hayal-qızlar, bólim baslıqları, xızmetkerleri, sonıń menen birge, fakultetler dekanlarınıń hayal-qızlar máseleleri boyınsha másláhátshileri, dekan orınbasarları, tyutorlarǵa bayram sawǵaları tapsırıldı.

Ilajda institut prorektorları, bólim baslıqları sózge shıǵıp, ómirimiz gúltajları bolǵan hayal-qızlardı institut rektoratı hám barlıq jámááti atınan qızǵın qutlıqlap, jumıslarında tabıslar, shańaraqlarına amanlıq, awızbirshilik, qut-bereket tiledi.

Kórsetilip atırǵan bunday húrmet hám itibardan tolqınlanǵan hayal-qızlar da sózge shıǵıp, óz minnetdarshılıqların bildirdi.

Xalıqaralıq hayal-qızlar kúni múnásibeti menen bayram ilajları institutımız boylap dawam etpekte.

NMPI baspasóz xızmeti.