Ózbekstan Respublikası Prezidentiniń 2022-jıl 5-marttaǵı «Zulfiya atındaǵı Mámleketlik sıylıǵı menen sıylıqlaw haqqında»ǵı qararına muwapıq, Ájiniyaz atındaǵı Nókis mámleketlik pedagogikalıq institutı Pedagogika fakulteti muzıkalıq tálim baǵdarınıń 4-kurs studenti Orınbaeva Erkinay Quwanıshbay qızı Zulfiya atındaǵı Mámleketlik sıylıqtıń laureatı boldı.

Erkinay Orınbaeva 2001-jıl 27-avgustta Xojeli rayonında dúnyaǵa kelgen. Balalıǵınan milliy qosıqlarımızdı atqarıwǵa ayrıqsha ıqlas qoyǵan Erkinay Nókis qalasındaǵı 2-sanlı qánigelestirilgen mektepti pitkergennen soń qızıǵıwshılıǵı boyınsha Nókis mádeniyat hám kórkem óner kolledjinde muzıka sırların úyrendi.

2018-jılı Ájiniyaz atındaǵı Nókis mámleketlik pedagogikalıq institutınıń muzıkalıq tálim baǵdarına mámleketlik grant tiykarında oqıwǵa qabıl etildi.

Erkinay dosları arasında óziniń shaqqanlıǵı, miynet súygishligi, bilimi menen ajıralıp turadı. Onıń kórkem ónerge bolǵan qızıǵıwshılıǵı joqarı. Mektepte, máhállede, institutta ótkeriletuǵın barlıq mádeniy ilajlarǵa, ushırasıw keshelerine turaqlı túrde qatnasadı.

Erkinay Orınbaeva balalıǵınan duwtardıń álwan túrli sırların ustazı Ǵayratdin Ótemuratovtan úyrenip kelmekte. Milliy folklorımızǵa bolǵan qızıǵıwshılıǵı, itibarı oǵada bálent. Milliy saz ásbabımız bolǵan alamoynaq duwtarda milliy qosıqlarımızdı atqarıwdı xosh kóredi.

Ol «Jaslar kúni», «Qızlar klubı», «Jaslar – keleshek qurıwshıları» uranı tiykarında ótkerilip kiyatırǵan jaslar festivallarında, respublikalıq tańlawlarda, Nawrız hám Ǵárezsizlik bayramları múnásibeti menen ótkeriletuǵın koncert baǵdarlamalarında belsene qatnasıp, diplomlar, húrmet jarlıqları menen sıylıqlanǵan.

Erkinay óziniń talantlı, uqıbı, talapshańlıǵı, óz ústinde tınbay izleniwi hám tálim-tárbiyası menen teńlesleri arasında ayrıqsha itibar hám mehirge ılayıq bolǵan, úlgili student bolıp esaplanadı.

Biz óz gezeginde Erkinay Orınbaevanıń Zulfiya atındaǵı Mámleketlik sıylıqtıń laureatı bolǵanı menen qutlıqlay otırıp, onıń aldaǵı dóretiwshilik hám ilimiy jumıslarında tabıslar tileymiz!

NMPI baspasóz xızmeti.