ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Qabul 2024

Xalıqaralıq hayal-qızlar kúni bayramı keń túrde belgilendi

Ájiniyaz atındaǵı Nókis mámleketlik pedagogikalıq institutında 8-mart – Xalıqaralıq hayal-qızlar kúni múnásibeti menen bayram ilajı bolıp ótti.

Ilajda sózge shıqqanlar elimizde hayal-qızlardıń huqıq hám máplerin támiyinlewge húkimetlik dárejede itibar qaratılıp, olardıń oqıwı, jumıs islewi, isbilermenlik penen shuǵıllanıwı, shańaraqlarınıń abadanlıǵı ushın múnásip sharayatlar jaratılıp atırǵanın atap ótti.

Hayal-qızlarǵa kórsetilip atırǵan ǵamqorlıqlar hám itibardıń ayqın kórinisi sıpatında Rawajlanıw strategiyasında belgilep berilgen usı baǵdardaǵı maqsetlerdi atap ótiw orınlı. Usı jıldıń 1-mart kúni Prezident Shavkat Mirziyoev basshılıǵında ótkerilgen videoselektor májilisinde hayal-qızlar ushın tariyxıy jańalıqlar sıpatında bahalanıp atırǵan sharayatlar, imkaniyatlar belgilep berildi. Usı tiykarda 2022-2026-jıllarǵa mólsherlengen Hayal-qızlar bilimlendiriwin qollap-quwatlaw baǵdarlaması qabıl etildi.

Baǵdarlama sheńberinde házirgi waqıtta hayal-qızlardıń úlesi tómen bolǵan anıq pánler, texnika hám huqıqtanıw baǵdarlarındaǵı JOOlarda hayal-qızlardan ibarat studentler úlesi házirgi 24 procentten 40 procentke shekem jetkeriliwi, bunıń ushın hár jılı hayal-qızlardıń student bolıwına kvotanıń keminde 50 procenti anıq pánler, texnika hám huqıqtanıw baǵdarları ushın maqsetli ajıratılatuǵınlıǵı belgilendi.

Jańa oqıw jılınan baslap JOO, texnikum hám kolledjlerde oqıp atırǵan qızlarǵa tálim kontraktların tólew ushın, birinshi márte, 7 jıllıq múddetke procentsiz kredit beriw engiziletuǵın boldı.

Sonıń menen birge, jańa oqıw jılınan baslap magistraturada oqıp atırǵan qızlardıń kontrakt pulları tolıq byudjetten qaplap berilip, hár jılı 50 qız abıroylı sırt el JOOlarına bakalavr hám 10 qız magistraturaǵa oqıwǵa jiberiledi. Járdemge mútáj shańaraq wákilleri, ata yamasa anasınan ayrılǵan 150 qızdıń tálim kontraktı jergilikli byudjetten qaplap beriledi. Jas perzenti bolǵan student-qızlarǵa aralıqtan oqıwǵa sharayat jaratıladı hám doktorantura baǵdarında hayal-qızlar ushın hár jılı keminde 300 den maqsetli kvota ajıratıladı.

Usınday imkaniyatlardan tolıq paydalanǵan búgingi jaslarımız arasınan joqarı dárejeli Mámleketlik sıylıqlardıń laureatları, xalıqaralıq hám respublikalıq tańlawlardıń jeńimpazları jetilisip shıqpaqta.

Ásirese, bayram qarsańında Pedagogika fakulteti muzıkalıq tálim baǵdarınıń 4-kurs studenti Orınbaeva Erkinay Quwanıshbay qızınıń Zulfiya atındaǵı Mámleketlik sıylıqtıń laureatı bolǵanı institut jámááti hám xalqımız ushın xosh xabar boldı.

Bayram ilajında usınday joqarı nátiyjelerge erisip atırǵan studentlerge tálim-tárbiya berip atırǵan, ilimiy-pedagogikalıq jumıslarda joqarı nátiyjelerge erisip kiyatırǵan hayal-qızlardan ibarat bólim baslıqları hám xızmetkerleri, fakultet dekanları, kafedra baslıqları, professor-oqıtıwshılar, sonday-aq, student-qızlarǵa bayram sawǵaları saltanatlı túrde tapsırıldı.

Bayram ilajı instituttıń talantlı jasları atqarıwındaǵı koncert baǵdarlaması menen dawam etti.

NMPI baspasóz xızmeti.