Zulfiya sıylıǵınıń laureatı Erkinay Orınbaeva kútip alındı

Xabarıńız bar, Ózbekstan Respublikası Prezidentiniń 2022-jıl 5-marttaǵı «Zulfiya atındaǵı Mámleketlik sıylıǵı menen sıylıqlaw haqqında»ǵı qararına muwapıq, Qaraqalpaqstan Respublikasınan eki student – Ájiniyaz atındaǵı Nókis mámleketlik pedagogikalıq institutı Pedagogika fakulteti muzıkalıq tálim baǵdarınıń 4-kurs studenti Erkinay Orınbaeva hám Berdaq atındaǵı Qaraqalpaq mámleketlik universiteti Biologiya fakultetiniń 2-kurs studenti Zuxraxon Maqsadova Zulfiya atındaǵı Mámleketlik sıylıqtıń laureatı bolǵan edi.

Búgin, 9-mart kúni Nókis temir jol vokzalında Mámleketlik sıylıqtıń laureatı bolǵan Ájiniyaz atındaǵı Nókis mámleketlik pedagogikalıq institutı Pedagogika fakulteti muzıkalıq tálim baǵdarınıń 4-kurs studenti Erkinay Orınbaeva saltanatlı túrde kútip alındı.

Ilajǵa institut jámááti, Xojeli rayonı hákimligi wákilleri, Erkinaydıń aǵayin-tuwısqanları, dosları, sonday-aq, ǵalaba xabar quralları wákilleri qatnastı.

Erkinay Orınbaeva 2001-jıl 27-avgustta Xojeli rayonında dúnyaǵa kelgen. Balalıǵınan milliy qosıqlarımızdı atqarıwǵa ayrıqsha ıqlas qoyǵan Erkinay mektepti pitkergennen soń qızıǵıwshılıǵı boyınsha Nókis mádeniyat hám kórkem óner kolledjinde ustazı Ózbekstan xalıq baqsısı Ǵayratdin Ótemuratovtan baqsıshılıq óneri hám muzıka sırların úyrendi.

2018-jılı Ájiniyaz atındaǵı Nókis mámleketlik pedagogikalıq institutınıń muzıkalıq tálim baǵdarına mámleketlik grant tiykarında oqıwǵa qabıl etildi.

Institutta tájiriybeli professor-oqıtıwshılardan tálim alıp, dóretiwshilik penen qosa ilimiy basshısı, muzıkalıq tálim kafedrasınıń docenti Sofiya Tájetdinova menen birge ilimiy-izertlew jumısların alıp barmaqta.

Erkinay dosları arasında óziniń shaqqanlıǵı, miynet súygishligi, bilimi menen ajıralıp turadı. Onıń kórkem ónerge bolǵan qızıǵıwshılıǵı joqarı. Mektepte, máhállede, institutta ótkeriletuǵın barlıq mádeniy ilajlarǵa, ushırasıw keshelerine turaqlı túrde qatnasadı.

Ol kóplegen xalıqaralıq hám respublikalıq tańlawlarda, jaslar festivallarında, Nawrız hám Ǵárezsizlik bayramları múnásibeti menen ótkeriletuǵın koncert baǵdarlamalarında belsene qatnasıp, diplomlar, húrmet jarlıqları menen sıylıqlanǵan.

– Keleshektegi maqsetlerim oǵada úlken. Qaraqalpaq baqsıshılıq ónerin ele de rawajlandırıw, dástanlarımız, qosıqlarımızdı dúnya saxnalarında atqarıw menen bir qatarda usı baǵdardaǵı ilimiy jumıslarımdı da dawam ettirip, xalqımızdıń, Prezidentimizdiń isenimin aqlawǵa háreket etemen. Bul sıylıq meni usı maqsetlerime qaray ele de alǵa talpındıra beredi, – deydi Erkinay Orınbaeva.

Islam Matekov,
NMPI baspasóz xatkeri.
Avtordıń túsirgen fotoları.