Usı jıldıń 28-fevral – 6-mart kúnleri aralıǵında Xorezm wálayatınıń Úrgenish qalasında voleybol boyınsha hayal-qızlar arasında XXIX Ózbekstan chempionatınıń ekinshi tur oyınları bolıp ótti.

Jarısqa qatnasıp atırǵan 9 komanda arasında Qaraqalpaqstan Respublikası atınan qatnasıp atırǵan Ájiniyaz atındaǵı Nókis mámleketlik pedagogikalıq institutınıń qızlar saylandı komandası dáslepki oyında Samarqand wálayatı, ekinshi oyında Jizzaq wálayatı komandaların, al úshinshi oyında maydan iyeleri bolǵan xorezmli qızlardı sáykes túrde 3:0, 3:2 hám 3:0 esaplarında jeńip shıǵıp, Namanganda bolıp ótken dáslepki turdaǵı sıyaqlı usı ekinshi turda da tolıq ústinlikke iye boldı.

Solay etip, ótkerilgen eki turdıń nátiyjelerine muwapıq, Qaraqalpaqstan Respublikası atınan qatnasıp atırǵan Ájiniyaz atındaǵı Nókis mámleketlik pedagogikalıq institutınıń qızlar saylandı komandası ulıwma 21 upay menen 1-orındı iyelep turıptı. Ekinshi orındı 19 upay toplaǵan Namangan, al úshinshi orındı 18 upay menen Ándijan wálayatlarınıń komandaları iyeledi.

Jarısqa sportshılarımızdı sport veteranı Azat Kazakov tayarladı.

Esletip ótemiz, chempionat may ayına shekem dawam etetuǵın ulıwma 5 turdan ibarat bolıp, kelesi tur oyınları usı jıldıń 1-7-aprel kúnleri Ándijan wálayatında bolıp ótedi.

NMPI baspasóz xızmeti.