Xabarıńız bar, Prezident Shavkat Mirziyoyevtiń basshılıǵında usı jıldıń 4-mart kúni joqarı oqıw orınları studentleriniń bántligin támiyinlew boyınsha tiykarǵı wazıypalarǵa baǵıshlanǵan videoselektor májilisi ótkerilgen edi.

Onda mámleket keleshegi, barlıq tarawlar hám joybarlardıń tabısı bilimli, zamanagóy pikirleytuǵın, óz tarawınıń mamanları bolǵan insanlarǵa baylanıslı ekenligi atap ótilgen edi. Sonlıqtan, elimizde bilimlendiriw tarawın, insan kapitalın rawajlandırıwǵa ayrıqsha itibar qaratılmaqta.

Usı maqsetlerden kelip shıǵıp Ájiniyaz atındaǵı Nókis mámleketlik pedagogikalıq institutınıń Karyera orayı qasında kovorking orayı jumıs basladı.

– Kovorking orayı hám oqıp, hám jumıs isleytuǵın studentler, sonıń menen birge, jumıs islew niyetinde bolǵan jaslarǵa sharayatlar jaratıw, olardı qollap-quwatlaw ushın shólkemlestirildi. Búgingi kúnde institut kóleminde oqıw menen birge jumıs penen bánt bolǵan 400 den aslam studentler bolıp, olar ushın bul jerde zamanagóy kompyuterler, biypul internet tarmaǵı hám basqa da imkaniyatlar jaratılǵan. Sonıń menen birge, studentlerge miynet nızamshılıǵı boyınsha túsinik jumısların alıp barıw, huqıqıy másláhátler beriw jolǵa qoyılǵan, – deydi NMPI marketing hám studentler ámeliyatı bóliminiń baslıǵı Polat Xojaniyazov.

Institutta usı oraydıń jumısların jetilistiw maqsetinde bos xana hám imaratlardı studentlerge biypul ajıratıp, tólemli kurslar, turmıslıq hám basqa da xızmetlerdi shólkemlestiriw arqalı studentlerdiń bántiligin támiyinlew boyınsha jumıslar jolǵa qoyılıwı jobalastırılmaqta.

NMPI baspasóz xızmeti.