Ózbekstan Respublikası Ministrler Kabineti janındaǵı Bilimlendiriw sapasın qadaǵalaw mámleketlik inspekciyası menen Joqarı hám orta arnawlı bilimlendiriw ministrligi jumısshı toparı tárepinen Ájiniyaz atındaǵı Nókis mámleketlik pedagogikalıq institutında oqıw procesin sın kózqarastan úyreniw jumısları alıp barılmaqta.

Búgin, 14-mart kúni bilimlendiriw inspekciyası baslıǵı U.Tashkenbaev basshılıǵındaǵı jumısshı topar aǵzaları dáslep instituttıń fizika-matematika hám súwretlew óneri hám texnologiyalıq tálim fakultetlerinde bolıp, oqıw imaratındaǵı málimleme-resurs orayı, ámeliy shınıǵıwlar ushın ustaxanalar, laboratoriyalar, kompyuter xanaların kózden ótkerdi. Sonıń menen birge, instituttıń aralıqtan oqıtıw platforması menen tanısıp, bul baǵdardaǵı jumıslardı bunnan bılay da jetilistiriw boyınsha kórsetpeler berdi.

Jumısshı topar aǵzaları professor-oqıtıwshılar, sonıń menen birge, studentler menen sáwbetlesip, olardıń óz bilim hám kónlikpelerin ele de arttırıwı, maman kadrlar bolıp jetilisiwi ushın islenetuǵın jumıslardı birgelikte dodaladı, pikir alıstı.

Sonday-aq, jumısshı topar aǵzaları instituttıń jańadan qurılıp atırǵan oqıw imaratı hám jaqında paydalanıwǵa tapsırılǵan studentler turaq jayında boldı. Studentler turaq jayında bes baslama tiykarında studentlerdiń málimleme texnologiyaları, muzıka hám kórkem óner boyınsha bilimleri, kónlikpelerin arttırıw, kitapqumarlıqtı keń úgit-násiyatlaw baǵdarında ámelge asırılıp atırǵan jumıslar menen tanıstı.

Bunday úyreniw jumıslarınan gózlengen baslı maqset bilimlendiriwdiń sapasın arttırıwǵa tosqınlıq etip atırǵan mashqalalardı anıqlaw, sapa hám nátiyjelilik kórsetkishlerin arttırıw, sonday-aq, ilimiy hám innovaciyalıq jumıslardı nátiyjeli shólkemlestiriw arqalı kadrlar tayarlaw sistemasınıń básekige shıdamlılıǵın arttırıwdan ibarat.

Jumısshı topar tárepinen joqarı oqıw orınlarındaǵı tálim baǵdarları hám qánigelikler boyınsha oqıw-normativlik hújjetler, JOOlardıń milliy reytingdegi ornın joqarılatıw hám xalıqaralıq reytinglerge kiriw boyınsha ámelge asırılıp atırǵan jumıslar, professor-oqıtıwshılardı jumısqa qabıllawda ashıq-aydınlıqtıń támiyinlengenligi, joqarı bilimlendiriw processlerin basqarıw málimleme sistemasınan paydalanıw jaǵdayı, attestaciya processlerinde anıqlanǵan kemshiliklerdi saplastırıw menen baylanıslı bir qatar máselelerge itibar qaratıladı.

Úyreniw jumısları juwmaǵında JOOlarda bilimlendiriw processlerin jetilistiriw hám anıqlanǵan kemshiliklerdi saplastırıw boyınsha ámelge asırılatuǵın ilajlar baǵdarlaması, sonday-aq, jol kartaları islep shıǵıladı.

NMPI baspasóz xızmeti.