Usı jıldıń 13-mart kúni Ájiiniyaz atındaǵı Nókis mámleketlik pedagogikalıq institutında «Aydın» intellektual turniriniń VII máwsim final oyını ótkerildi.

Ájiniyaz atındaǵı Nókis mámleketlik pedagogikalıq institutı, Ózbekstan Jaslar isleri agentligi QR basqarması, Ózbekstan jaslar awqamı QR Keńesi menen birgelikte shólkemlestirilgen, sonday-aq, bilimli, ozıq oylı jaslardı bir jerge jámlestirgen, logikalıq hám qızıqlı sorawlarǵa bay bolǵan turnirde ulıwma 7 tur dawamında 40 komanda qatnastı.

VII máwsim final oyını nátiyjelerine muwapıq, 1-orındı «KarSU», 2-orındı «Alfa» hám 3-orındı «Aǵabiy» komandaları iyeledi.

Turnir jeńimpazları, sıylı orın iyeleri hám qatnasıwshıları Jaslar isleri agentligi Qaraqalpaqstan Respublikası basqarması baslıǵı I.Abdikalikov qatnasıwında diplom hám estelik sawǵaları menen sıylıqlandı.

Qosımsha túrde final oyınında jeńimpaz bolǵan komandalardıń Xiywa qalasında sayaxatları shólkemlestiriletuǵınlıǵı málim etildi.

Maǵlıwmat ornında atap ótiw kerek, «Aydın» intellektual turniriniń kelesi máwsim oyınları usı jıldıń aprel ayınan baslanıwı jobalastırılǵan.