Búgin, 25-mart kúni Ájiniyaz atındaǵı Nókis mámleketlik pedagogikalıq institutı Baslawısh tálim fakulteti ulıwma pedagogika hám psixologiya kafedrası tárepinen «Qaraqalpaqstanda pedagogika ilimin rawajlandırıwdıń aktual máseleleri: búgin hám keleshek» atamasındaǵı respublikalıq ilimiy-teoriyalıq konferenciya óz jumısın basladı.

Konferenciyanıń ashılıw-plenarlıq májilisin instituttıń ilimiy isler hám innovaciyalar boyınsha prorektorı M.Jalelov ashıp berdi hám basqarıp bardı.

Ilajda instituttıń jaslar máseleleri hám ruwxıy-aǵartıwshılıq isleri boyınsha prorektorı, pedagogika ilimleriniń doktorı Q.Qodirov «Joqarı bilimlendiriw sistemasında ideologiyalıq tárbiyanıń baslı baǵdarları», pedagogika ilimleriniń kandidatı, docent T.Jiyemuratov «XX ásirdiń 30-jıllarında Tashkent átirapındaǵı qaraqalpaq tilinde sabaq oqıtılǵan mektepler», pedagogika ilimleriniń kandidatı, docent Q.Seytmuratov «Jaslar arasında jazba sawatlılıqtı rawajlandırıwdıń geypara máseleleri», pedagogika ilimleriniń kandidatı, docent T.Saparbaev «Jańa Ózbekstanda pedagogika iliminiń rawajlanıw jaǵdayları», ulıwma pedagogika hám psixologiya kafedrası tayanısh doktorantı Z.Sársenbaeva «Paremialardıń lingvomádeniy hám lingvokognitivlik analizi» atamalarındaǵı bayanatları menen shıǵıp sóyledi.

Konferenciyanıń maqseti búgingi kúnde Qaraqalpaqstanda pedagogika iliminde tálim hám tárbiyanı rawajlandırıwǵa qoyılıp atırǵan talaplar, tarawdaǵı bir qatar mashqalalar, olardıń sheshimleri boyınsha usınılıp atırǵan ilimiy jańalıqlardı talqılaw, nátiyjelerin ámeliyatqa engiziw boyınsha usınıslar islep shıǵıw, sonday-aq, studentler, jas ilimiy izleniwshilerdiń qızıǵıwshılıǵın arttırıw arqalı olardı qollap-quwatlawdan ibarat bolıp esaplanadı.

Konferenciyanıń ashılıw-plenarlıq májilisinde sóz etilgen máseleler boyınsha tiyisli dodalawlar, soraw-juwaplar bolıp ótti.

Konferenciya óz jumısın sekciyalar boyınsha dawam ettirmekte.

NMPI baspasóz xızmeti.