Búgin, 25-mart kúni Ájiniyaz atındaǵı Nókis mámleketlik pedagogikalıq institutı studentler turaq jayı aldında ulıstıń ullı kúni, shıǵıs xalıqlarınıń jasarıw hám jańalanıw áyyyamı – Nawrız ulıwma xalıqlıq bayramı múnásibeti menen súmelek seyili bolıp ótti.

Seyilde úlken qazanlarda Nawrız taǵamı bolǵan súmelek, sonday-aq, palaw pisirilip, har bir fakultettiń milliy taǵamlardan ibarat kórgizbeleri shólkemlestirildi.

Bayram seyiline institut jámááti hám studentleri menen birge paytaxtımızdıń «Qumbız awıl» jáne «Kók ózek» mákan puqaralar jıyınlarınıń turǵınları da qatnasıp, hár qıylı milliy hám yoshlı muzıkalarǵa ayaq-oyınlarǵa túsip, kewillerin kóterdi.

Ilajǵa institut rektorı Bayrambay Otemuratov basshılıǵında rektorat hám fakultetlerdiń basshıları da qatnasıp, ózleriniń bayram tileklerin bildirdi.

Bayram seyilinde instituttıń «Tumaris», «Sıy perde», «Tarannum» ansamblleri aǵzaları hám talantlı studentler milliy qosıqlar atqarıp, bayram qatnasıwshılarına báhár keypiyatın baǵıshladı.

Studentler turaq jayında jasaytuǵın studentler ushın palaw tarqatıldı.

Solay etip, búginnen baslanǵan bayram seyilleri institutta erteń, 26-mart kúni teatrlastırılǵan muzıkalı-xoreografiyalıq koncert baǵdarlaması, sonday-aq, xalıq seyilleri menen dawam etedi.

NMPI baspasóz xızmeti.