Ájiniyaz atındaǵı Nókis mámleketlik pedagogikalıq institutında ulıstıń ullı kúni, shıǵıs xalıqlarınıń jańalanıw hám jasarıw áyyamı esaplanǵan Nawrız bayramı múnásibeti menen eki kún – 25-26-mart kúnleri dawamında «Assalam, Nawrız – jańalanıw, miyrim-shápáát hám qádir-qımbat bayramı! » atamasında bayram seyilleri, sonday-aq, teatrlastırılǵan muzıkalı-xoreografiyalıq koncert baǵdarlaması bolıp ótti.

Dáslepki kúni instituttıń studentler turaq jayı aldında bayramǵa arnalǵan súmelek seyili bolıp ótti. Seyilde úlken qazanlarda Nawrız taǵamı bolǵan súmelek, sonday-aq, palaw pisirilip, har bir fakultettiń milliy taǵamlardan ibarat kórgizbeleri shólkemlestirildi.

Bayram seyiline institut jámááti hám studentleri menen birge paytaxtımızdıń «Qumbız awıl» jáne «Kók ózek» mákan puqaralar jıyınlarınıń turǵınları da qatnasıp, hár qıylı milliy hám yoshlı muzıkalarǵa ayaq-oyınlarǵa túsip, kewillerin kóterdi.

Búgin, 26-mart kúni azanǵı waqıttan baslap instituttıń sport maydanshasında palwanlar gúresi, arqan tartısıw, qol gúresi, láńgi, búrkit keldi, qasharman top, pátpelek ushırıw, tas kóteriw sıyaqlı milliy sport oyınları boyınsha barlıq fakultetlerdiń studentleri arasında jarıslar shólkemlestirildi.

Sonday-aq, bayram múnásibeti menen institut studentleriniń qol óneri úlgileri, súwretlew óneri hám injenerlik grafikası boyınsha kórgizbeler, kitaplar yarmarkası bolıp ótti.

Saat 11: 00 de instituttıń bayramǵa say etip bezetilgen bas imaratı aldında «Assalam, Nawrız – jańalanıw, miyrim-shápáát hám qádir-qımbat bayramı! » atamasındaǵı teatrlastırılǵan muzıkalı-xoreografiyalıq koncert baǵdarlaması baslandı.

Ilajdı institut rektorı Bayrambay Otemuratov ashıp berip, jıynalǵanlardı, barlıq bayram seyili qatnasıwshıların shıǵıs xalıqlarınıń jıl bası bolǵan Nawrız ulıwma xalıqlıq bayramı menen qutlıqlap, institutta sońǵı jıllarda ilimiy-pedagogikalıq baǵdarda qolǵa kirgizilip atırǵan tabıslarǵa ayrıqsha toqtaldı.

Koncertte instituttıń «Tumaris» qosıq hám ayaq-oyın xalıq ansambli, «Sıy perde», «Tarannum», «Dugonalar» hám basqa da ansamblleri, «Turan» teatr-studiyası, sonday-aq, bir topar talantlı studentler tárepinen milliy úrp-ádetler, dástúrler, qosıqlar, ayaq-oyınlar atqarılıp, milletler aralıq tatıwlıqtı jırlaytuǵın qaraqalpaqsha, ózbekshe, qazaqsha, túrkmenshe, russha, italyansha qosıqlar atqarıldı hám jıynalǵanlarǵa bayram keypiyatın inám etti.

Ilajǵa Qaraqalpaqstan Respublikası Ministrler Keńesi Baslıǵınıń orınbasarı Abatbay Dániyarov qatnastı.

Islam Matekov,
NMPI baspasóz xatkeri.
Avtordıń túsirgen fotoları.