ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Qaraqalpaqstan Respublikası Konstituciyası qabıl etilgenine 29 jıl tolıwına arnalǵan saltanatlı májilis bolıp ótti

Búgin, 1-aprel kúni Ájiniyaz atındaǵı Nókis mámleketlik pedagogikalıq institutında Qaraqalpaqstan Respublikası Konstituciyasınıń qabıl etilgenine 29 jıl tolıwına arnalǵan saltanatlı májilis bolıp ótti.

Ilajǵa Qaraqalpaqstan Respublikası prokurorınıń orınbasarı Erpolat Qayıpbergenov, Qaraqalpaqstan Respublikası sudınıń sudyası Maxmud Bayniyazov professor-oqıtıwshılar, student-jaslar hám ǴXQ wákilleri qatnastı.

Saltanatlı májilis mámleketlik gimnlerdiń atqarılıwı menen baslandı.

Ilajdı instituttıń jaslar máseleleri hám ruwxıy-aǵartıwshılıq isleri boyınsha prorektorı Q.Qodirov basqarıp bardı.

Atap ótilgenindey, konstituciya – hár bir mámlekettiń tariyxı, búgingi kúni hám keleshegin, xalıqtıń erk-ıqrarın ózinde sáwlelendiriwshi tiykarǵı nızam bolıp esaplanadı.

Qaraqalpaqstan Respublikasınıń Konstituciyası 1993-jıl 9-aprel kúni on ekinshi shaqırıq Qaraqalpaqstan Respublikası Joqarǵı Sovetiniń on ekinshi sessiyasında qabıl etilgen.

Konstituciya ámelge asırılıp atırǵan demokratiyalıq reformalardıń hám olardıń nızamshılıq tiykarların jaratıwdıń baslı huqıqıy tiykarı, insan huqıq hám erkinlikleriniń isenimli qorǵalıwınıń kepili bolıp esaplanadı.

Bas Nızamımızda barlıq normalar eń aldı menen insannıń huqıq hám máplerin kepillikke ala otırıp, insan-jámiyet-mámleket principi tiykarında islep shıǵılǵan.

Májiliste shıǵıp sóylewshiler tárepinen joqarıdaǵı maǵlıwmatlar menen birgelikte Konstituciyamızǵa kirgizilgen sońǵı ózgeris hám qosımshalar, olardıń áhmiyeti haqqında tolıq maǵlıwmatlar berildi.

Ilajda instituttıń milliy ideya, ruwxıylıq tiykarları hám huqıq tálimi kafedrası aǵa oqıtıwshısı Baxtıgúl Arzieva Konstituciyada insan huqıq hám erkinlikleriniń kepillikleri, olar tiykarında islep shıǵılıp atırǵan normativlik-huqıqıy hújjetler haqqında bayanat jasadı.

Shıǵıp sóylewshiler jıynalǵanlardı Qaraqalpaqstan Respublikası Konstituciyasınıń qabıl etilgenine 29 jıl tolıwı bayramı menen qutlıqlap, mámleketimizde nızam ústinligin támiyinlew, jaslardıń huqıqıy sawatlılıǵı jáne mádeniyatın arttırıw baǵdarında ámelge asırılıp atırǵan jumıslar haqqında aytıp ótti.

NMPI baspasóz xızmeti.