Búgin, 12-aprel kúni Ájiniyaz atındaǵı Nókis mámleketlik pedagogikalıq institutında Qaraqalpaqstan Respublikasına miyneti sińgen ilim ǵayratkeri, professor Mengliboy Bóranovtıń 90 jıllıǵına arnalǵan «Globallasıw dáwirinde lingvistika hám ádebiyattanıwdıń rawajlanıwı jáne bilimlendiriw texnologiyaları» atamasındaǵı respublikalıq ilimiy-ámeliy konferenciya óz jumısın basladı.

Konferenciyanı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov ashıp berdi hám basqarıp bardı.

Konferenciyanıń ashılıw plenarlıq májilisinde instituttıń ózbek tili kafedrasınıń docenti, filologiya ilimleriniń doktorı G.Qurbaniyazov, qaraqalpaq tili kafedrasınıń docenti, filologiya ilimleriniń doktorı A.Pirniyazova, ózbek ádebiyatı kafedrasınıń docenti, filologiya ilimleriniń kandidatı K.Tashanov professor M.Bóranovtıń ustazlıq hám ilim jolındaǵı pidayılıǵı, miynetleri haqqında bayanatlar jasadı.

Professor M.Bóranov 1948-1950-jıllarda Túrkmenstannıń Tashawız wálayatındaǵı eki jıllıq muǵallimler institutın pitkergennen soń, miynet jolın Góne Úrgenishtegi 10-sanlı mektepte ózbek tili hám ádebiyatı páni muǵallimi bolıwdan baslaǵan.

1952-1957-jılları Orta Aziya mámleketlik universitetin pitkergennen soń Xojeli rayonındaǵı mekteplerde keleshek áwladlarǵa sabaq ótti.

1995-jıldan baslap Nókis mámleketlik pedagogikalıq institutınıń ózbek tili hám ádebiyatı kafedrasınıń professorı bolıp, kóp jıllar dawamında jaslarǵa bilim berip keldi.

M.Bóranov ilimiy-izertlew jumısların dialektologiya baǵdarında alıp barǵan bolıp, 1972-jılı «Qaraqalpaqstandaǵı ózbek dialektlerinde sharwashılıq atamaları» temasında kandidatlıq dissertaciyasın qorǵaǵan.

Usınday miynetleriniń nátiyjesinde docent, Qaraqalpaqstanǵa miyneti sińgen muǵallim, professor húrmetli ataqlarına múnásip dep tabıldı.

Alımnıń baslaması hám shólkemlestiriwinde «Filologiyalıq izertlewler», «Ózbek filologiyasınıń máseleleri» atamalarında kafedra oqıtıwshılarınıń 4 toplamı baspadan shıqqan. Olarda ózbek til bilimi hám ádebiyattanıwınıń áhmiyetli mashqalalarına baylanıslı ilimiy maqalalar járiyalandı.

M.Bwronov ilimiy-pedagogikalıq jumısları dawamında joqarı oqıw orınlarınıń studentleri hám ulıwma bilim beriw mektepleriniń muǵallimleri ushın metodikalıq hám oqıw qollanbalar, monografiyalar hám 100 aslam ilimiy maqalalar dóretti.

Konferenciyanıń ashılıw saltanatında ilimpazdıń birge islesken kásiplesleri, belgili professorlar, ilim ǵayratkerleri, shákirtleri, ómirlik joldası hám perzentleri shıǵıp sóylep, onıń biybaha miyrası, pidayılıq xızmetleri haqqında aytıp ótti.

Konferenciya erteń, 13-aprel kúni sekciyalar boyınsha óz jumısın dawam ettiredi.

NMPI baspasóz xızmeti.