Búgin, 13-aprel kúni Ájiniyaz atındaǵı Nókis mámleketlik pedagogikalıq institutında «AMI LABS» kompaniyasınıń bas texnikalıq direktorı, qaraqalpaqstanlı programmist Beknazar Abdikamalov penen student-jaslardıń ushırasıwı bolıp ótti.

Ushırasıwda jas programmist óziniń balalıqtaǵı qızıǵıwshılıqları, bilim alıw, til úyreniw, óz aldına maqset qoyıp jasap, soǵan erisiw jolında dus kelgen qıyınshılıqları hám olardı jeńip ótiw tájiriybesi haqqında aytıp berdi.

Sonday-aq, házirgi waqıtta jaslar kóbirek óz ústinde islep, bilim hám tájiriybelerin arttırıw ushın nelerge áhmiyet qaratıw kerekligi haqqında motivaciyalıq bayanat jasadı.

— Eń dáslep hár qanday jumıs onıń tiykarın, tırnaǵın salıwdan baslanadı. Usı basqıshtı jaqsı shólkemlestiriw keleshektegi háreketlerińizdiń tiykarı bolıp xızmet etedi. Adam ózi ádetlerden quralǵan boladı. Siz aldıńızǵa qoyǵan maqsetler ushın ózińizge paydalı is-háreketlerdi dawamlı islep barsańız, ol álbette ádetke aylanadı. Bul bolsa siziń maqsetlerińizdi ámelge asırıwǵa qaray baǵdarlaydı, — dedi qaraqalpaqstanlı jas programmist Beknazar Abdikamalov.

Ushırasıw dawamında ol Koreyadaǵı oqıw procesi, «Amazon» kompaniyasında islegen jumısları, házirgi waqıtta óz baslaması tiykarında shólkemlestirilgen «AMI LABS» kompaniyası haqqında maǵlıwmatlar berip ótti.

Studentler ushırasıw dawamında qızıqtırǵan sorawların berip, juwaplar aldı.

NMPI baspasóz xızmeti.