Ájiniyaz atındaǵı Nókis mámleketlik pedagogikalıq institutında profilaktika kúni múnásibeti menen student-jaslar qatnasıwında ishki isler uyımları xızmetkerleri menen ushırasıw bolıp ótti.

Ushırasıwǵa Nókis qalalıq Ishki isler uyımlarınıń jumısların muwapıqlastırıw basqarmasına qaraslı 4-sanlı Ishki isler bólimi baslıǵı, podpolkovnik Qayratdin Pirniyazov, instituttıń profilaktikalıq inspektorı, kapitan Bahadır Masharipov hám bir topar student-jaslar qatnastı.

Ushırasıwda taraw qánigeleri sońǵı waqıtlarda jaslar tárbiyası, olardıń bos waqıtların mazmunlı ótkeriw menen baylanıslı bir qatar unamlı jumıslar ámelge asırılıp atırǵanına qaramastan, ayırım jaslardıń bilip-bilmey huqıqbuzarlıq hám jınayatshılıq háreketlerine qosılıp qalıp atırǵanı, bunıń unamsız aqıbetleri haqqında maǵlıwmatlar berdi.

Ásirese, jaslar arasında onlayn qumar oyınlarına hádden tıs beriliw, bunıń aqıbetinde kóp muǵdarda qarızǵa ushırap qalıw jaǵdaylarınıń jiyi ushırasıp atırǵanın atap ótip, bunıń nızamǵa qayshı háreket ekenligi, sonday-aq, onıń materiallıq-ruwxıy aqıbetleri haqqında jaslarǵa túsinikler berildi.

Ushırasıw dawamında jaslar arasında jınayatshılıq hám huqıqbuzarlıqlardıń aldın alıw baǵdarında ele de nátiyjelilikke erisiw ushın ámelge asırılatuǵın jumıslarǵa toqtalıp ótilip, studentler menen soraw-juwaplar ótkerildi.

NMPI baspasóz xızmeti.