ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Qabul 2024

NMPI jámááti hám student-jasları Nókiste ótkerilgen «Úsh áwlad ushırasıwı»na belsene qatnastı

14-aprel kúni paytaxtımız Nókis qalasında «Nuranıylardı qádirleymiz» súreni tiykarında «Úsh áwlad ushırasıwı» bolıp ótti.

Ushırasıwda kóp jıllar dawamında mámleketimizdiń jámiyetlik-siyasiy, sociallıq-ekonomikalıq tarawlarında jemisli miynet etken, keleshek áwladlar ushın úlgi esaplanǵan elimiz nuranıyları jaslar qatnasıwında úlken húrmet-izzetke bólengen halda kútip alındı.

Milliyligimizdiń nıshanı bolǵan qaraúyler tigilip, olarda dasturxanlar jayıldı. Qaraúyler aldında kóp milletli, awızbirshilikli Qaraqalpaqstandaǵı qaraqalpaq, ózbek, qazaq, túrkmen, rus, koreys hám basqa da millet wákilleriniń kórgizbeleri shólkemlestirilip, milliy qosıqları, ayaq-oyınları atqarıldı.

Ilajǵa Qaraqalpaqstan Respublikası Joqarǵı Keńesiniń Baslıǵı M.Kamalov, Ózbekstan Máhálle hám nuranıylardı qollap-quwatlaw ministri T.Xudaybergenov qatnasıp, mámleketimiz basshısı tárepinen nuranıylar, veteranlardı qollap-quwatlaw, olardıń turmıslıq tájiriybesin jaslarǵa úlgi etip kórsetiwde ámelge asırılıp atırǵan jumıslar hám olardıń nátiyjeleri haqqında atap ótti.

Ushırasıwda úsh áwlad wákilleri bir dasturxan átirapında qızǵın sáwbet qurıp, pikir almastı, jasıúlkenler jaslarǵa ómirlik tájiriybeleri menen bólisti.

Ilaj respublikamızdıń kórkem óner sheberleriniń atqarıwındaǵı koncert baǵdarlaması menen dawam etti.

NMPI baspasóz xızmeti.