Ájiniyaz atındaǵı Nókis mámleketlik pedagogikalıq institutı Dene mádeniyatı fakulteti dene tárbiyası kafedrasınıń shólkemlestiriwinde «Xalıqtıń jasaw orınlarında dene mádeniyatı hám sporttı rawajlandırıwda ekologiyalıq mádeniyattıń áhmiyeti» atamasındaǵı respublikalıq ilimiy-teoriyalıq konferenciya bolıp ótti.

Konferenciyanı instituttıń ilimiy isler hám innovaciyalar boyınsha prorektorı M.Jalelov ashıp berdi.

Konferenciyanıń maqseti házirgi waqıtta Qaraqalpaqstanda xalıqtıń salamatlıǵın bekkemlewde dene tárbiyası hám sporttıń áhmiyeti, qorshaǵan ortalıq, ekologiyalıq jaǵdaydıń insan salamatlıǵına tásiri, olardıń unamsız tásirlerin kemeytiw, tálim-tárbiyaǵa qoyılıp atırǵan jańa talaplar, tarawdaǵı sheshimin kútip turǵan máseleler, olar boyınsha tiyisli usınıslar islep shıǵıwdan ibarat boldı.

Ilajda instituttıń dene tárbiyası kafedrasınıń docenti P.Shılmanov «Balalardı fizikalıq tárbiyalawda xalıq hám milliy oyınlardan paydalanıwdıń pedagogikalıq imkaniyatları», usı kafedra baslıǵı D.Nurıshov «Dene tárbiya sabaqlarında ekologiyalıq mádeniyattı pedagogikalıq texnologiyalar arqalı rawajlandırıw basqıshları», docent A.Eshbaev «Физическая подготовка гимнастов в период годичного цикла», úlken oqıtıwshı A.Jumanov «Kúsh hám ádillik batırdıń qos qanatı», atamalarındaǵı bayanatları menen, sonday-aq, basqa da bayanatshılar shıǵıp sóyledi.

Konferenciyada Úrgenish mámleketlik universiteti hám Qaraqalpaq mámleketlik universitetinen miymanlar, dene mádeniyatı fakultetleriniń professor-oqıtıwshıları qatnasıp, ilajdı ótkeriwdiń áhmiyeti haqqında aytıp ótti.

Konferenciya óz jumısın sekciyalarda dawam ettirdi.

NMPI baspasóz xızmeti.