Búgin, 19-aprel kúni Ájiniyaz atındaǵı Nókis mámleketlik pedagogikalıq institutında jaslar arasında náshebentlik, spirtli ishimliklerge berilip ketiw, AIV hám AIJS sıyaqlı zıyanlı illetlerdiń aldın alıw maqsetinde tiyisli taraw qánigeleri menen ushırasıw bolıp ótti.

Ushırasıwǵa Qaraqalpaqstan Respublikası Ishki isler ministrligi Jınayat-izlew basqarması baslıǵınıń orınbasarı – náshebentlikke qarsı gúresiw bóliminiń baslıǵı N.Abdullaev, Respublikalıq narkologiyalıq orayınıń shıpakeri D.Qurbanova, Respublikalıq AIJSke qarsı gúresiw orayınıń shıpakeri Z.Qalmuratova hám basqa da qánigeler, student-jaslar qatnastı.

Ushırasıwdada qánigeler jaslar arasında úgit-násiyat hám profilaktikalıq ushırasıwlar, kesheler hám basqa da birqatar ilajlar alıp barılıp atırǵanına qaramastan, keleshegine úlken zıyan keltiretuǵın zıyanlı illetlerge duwshar bolıp atırǵanın, bunıń aqıbetlerine toqtap ótti.

Bıyılǵı jıldıń ótken dáwiri aralıǵında ótken jıldıń usı dáwirine salıstırǵanda náshebentlik penen baylanıslı jınayatlardıń keskin artqanlıǵı, ókinishlisi, olar arasında jaslardıń bar ekenligi oylandırarlıq jaǵday ekenligi atap ótildi. Náshebentlik zatlarǵa bolǵan beyimlilik dáslep qızıǵıwshılıq penen baslanıp, keyin ala mútájlikke, soǵan baǵınıshlılıqqa aylanıp qalatuǵınlıǵı, bunıń aqıbetinde ólimshilik jaǵdaylarınıń da baqlanıp atırǵanı anıq mısallar menen keltirildi.

Sonıń menen birge, sońǵı waqıtları jaslar arasında psixotrop zatlardan paydalanıw jaǵdaylarınıń jiyi ushırasıp atırǵanı, bunıń medicinalıq hám huqıqıy aqıbetleri haqqında maǵlıwmatlar berildi.

Ushırasıwda qánigeler tárepinen elimizde puqaralarımız arasında kóbirek ushırasatuǵın spirtli ishimliklerden paydalanıw, alkologizmniń unamsız aqıbetleri, adamnıń densawlıǵına, jasaw tárizine, turmısına bolǵan medicinalıq hám sociallıq tásirleri, sonday-aq, AIV infekciyası hám AIJS kesellikleri haqqında túsinikler berilip, olardıń aldın alıw boyınsha tiyisli másláhátler, kónlikpeler berildi.

Ushırasıw dawamında studentler ózlerin qızıqtırǵan sorawlarına juwaplar aldı.

Ilaj sońında zıyanlı illetlerdiń aqıbetleri haqqında sóz etilgen videofilm studentlerdiń názerine usınıldı.

NMPI baspasóz xızmeti.