Búgin, 19-aprel kúni Ájiniyaz atındaǵı Nókis mámleketlik pedagogikalıq institutında Ózbekstannıń Franciyadaǵı Elshixanası hám Franciya Xalıqaralıq birge islesiw hám bilimlendiriw associaciyası (ASIE) tárepinen shólkemlestirilgen sapar sheńberinde usı mámleket joqarı oqıw orınlarınıń professor-oqıtıwshıları hám studentlerinen ibarat delegaciya aǵzaları menen ushırasıw bolıp ótti.

Ushırasıwda instituttıń ilimiy isler hám innovaciyalar boyınsha prorektorı M.Jalelov miymanlardı respublikamızǵa saparı menen qutlıqlap, institutta xalıqaralıq shólkemler, joqarı oqıw orınları menen jolǵa qoyılǵan eki tárepleme birge islesiw jumısları haqqında maǵlıwmatlar berdi.

Sońǵı jıllarda instituttıń Franciyadaǵı joqarı oqıw orınları, ilimiy-izertlew orayları menen baylanısları artıp barmaqta. Atap aytqanda, 2020-jıl dekabr ayında institutta Ózbekstannıń Franciyadaǵı elshisi Sardor Rustambaev penen ushırasıw dawamında Nókis mámleketlik pedagogikalıq institutı hám Franciya Oqıtıw hám ilimiy izertlew boyınsha joqarı milliy institutı (INSHEA) arasında inklyuziv bilimlendiriw baǵdarında birge islesiw boyınsha memorandumǵa qol qoyılǵan edi.

Búgingi bolıp ótken ushırasıwda ASIE shólkeminiń rawajlanıw boyınsha vice-prezidenti, Burj texnologiyalıq universitetiniń inglis tili oqıtıwshısı Elodi Kaumon sapardıń maqseti eki mámleket jaslar arasında óz ara almasıwdı jedellestiriw, qorshaǵan ortalıq hám ekologiya tarawında óz ara tájiriybe almasıw máselelerin dodalawdan ibarat ekenligin atap ótti.

Ushırasıwda franciyalı professor-oqıtıwshılar hám studentler institut student-jasları menen sáwbetlesiwler ótkerip, Franciyadaǵı joqarı bilimlendiriw sisteması, imkaniyatlar haqqında maǵlıwmatlar berdi. Óz gezeginde, institut studentleri de Ózbekstan hám Qaraqalpaqstandaǵı joqarı oqıw orınları, sońǵı jıllarda ekologiyalıq turaqlılıqtı támiyinlew ushın alıp barılıp atırǵan keń kólemli jumıslar haqqında sóz etti. Jaslar usı baǵdarda óz ara erkin sáwbetlesti, bir-biri menen pikir almastı.

Ilajda instituttıń muzıkalıq tálim baǵdarında oqıp atırǵan talantlı studentler qobız hám alamoynaq duwtarda qaraqalpaq dástanlarınan úzindiler atqarıp, milliy saz ásbapları, aytılǵan dástanlar haqqında maǵlıwmatlar berdi.

Sonıń menen birge, miymanlarǵa Ózbekstan Qaharmanı, Ózbekstan hám Qaraqalpaqstan xalıq jazıwshısı Tólepbergen Qayıpbergenovtıń «Qarakalpaqnama» shıǵarması, qaraqalpaq jırawı sáwlelengen estelik sawǵaları tapsırıldı.

Franciyalı miymanlar usınday sıy-húrmet ushın minnetdarshılıq bildirip, institutqa saparın juwmaqladı.

NMPI baspasóz xızmeti.