Búgin, 21-aprel kúni Ájiniyaz atındaǵı Nókis mámleketlik pedagogikalıq institutında jaslar arasında jınayatshılıq hám huqıqbuzarlıqlardıń aldın alıwǵa baǵıshlanǵan ushırasıw bolıp ótti.

Ilajǵa Qaraqalpaqstan Respublikası Ishki isler ministri, polkovnik A.Orınbaev, Jaslar isleri agentligi Qaraqalpaqstan Respublikası basqarmasınıń baslıǵı I.Abdikalikov, sonday-aq, Qaraqalpaqstan Respublikası prokuraturası, Mámleketlik qáwipsizlik xızmeti Qaraqalpaqstan Respublikası basqarmasınan tiyisli juwapkerler, ishki isler uyımlarınıń tiyisli taraw basshıları, professor-oqıtıwshılar hám studentler qatnastı.

Ushırasıwdı institut rektorı B.Otemuratov basqarıp bardı.

Atap ótilgenindey, sońǵı jıllarda mámleketimizde jaslarǵa bolǵan itibar mámleketlik siyasat dárejesine kóterilip, Úshinshi Renessanstıń tiykarın jaratıwshı keleshek iyeleriniń oqıp bilim alıwı, kásip-óner iyelep, xalıqqa xızmet kórsetiwi, isbilermenlik penen shuǵıllanıwı, ózleriniń iygilikli maqsetlerin ámelge asırıwı ushın keń imkaniyatlar jaratılmaqta.

Jaslar menen ele de keńnen islesiw, olar arasına kirip barıw, olardıń bos waqıtların mazmunlı ótkeriw maqsetinde ótkerilip atırǵan ruwxıy-aǵartıwshılıq, mádeniy hám sport ilajlarına qaramastan olar arasında jınayatshılıq hám huqıqbuzarlıqlardıń ushırasıp atırǵanı ashshı haqıyqat. Ótken jılı respublikamız kóleminde joqarı oqıw orınlarınıń studentleri tárepinen ámelge asırılǵan jınayat hám huqıqbuzarlıqlar 19 dı quraǵan bolsa, usı jıldıń ótken úsh ayı dawamında bul kórsetkishtiń 12 ni quraǵanlıǵı tarawda ámelge asırılatuǵın jumıslardıń kólemi hám nátiyjeliligin jańa basqıshqa kóteriwdi talap etpekte.

Ushırasıwda bul baǵdarda usı kúnge shekem hár bir mákeme óz aldına jumıs islep kelgenligi, biraq bunnan bılay Ishki isler ministrliginiń profilaktikalıq inspektorları, Jaslar isleri agentliginiń máhállelerdegi jaslar jetekshileri hám institut tyutorlarınıń jumısların muwapıqlastırıw hám óz ara birgelikte islesiwin támiyinlew boyınsha jol kartasın islep shıǵıwǵa kelisip alındı.

Ilajda Ishki isler ministriniń tiyisli buyrıǵına muwapıq, Nókis mámleketlik pedagogikalıq institutı profilaktikalıq inspektorı lawazımına tayınlanǵan kapitap Masharipov Bahadır Jumabaevich tanıstırılıp, onıń lawazımlıq wazıypaları haqqında maǵlıwmatlar berildi.

Ushırasıw dawamında tiyisli juwapkerler studentler menen ashıq sáwbetlesiw ótkerip, olardıń sorawlarına juwaplar berdi hám jaslardıń atap ótilgen máseleler boyınsha kózqarasların, pikir-usınısların tıńladı.

Óz gezeginde, institut studentleri jaslar arasında jınayatshılıq hám huqıqbuzarlıqlar profilaktikası ilajlarında tek ǵana huqıq qorǵaw hám jámiyetlik tártipti támiyinlew uyımları emes, sonıń menen birge, hár bir jastıń ózi de belsendilik kórsetiwi, mámleketlik uyımlarǵa járdem beriwi kerekligin atap ótip, usınısların bildirdi.

Atap aytqanda, studentler arasında múddetli áskeriy xızmetti ótep kelgen jaslardı profilaktikalıq inspektorlarǵa biriktirgen halda jumıs islewin támiyinlew, bul baǵdardaǵı úgit-násiyat jumısların ele de kúsheytiw, jol háreketi qáwipsizligi qaǵıydalarına ámel etiliwin támiyinlewge ıqtıyarlı túrde járdem beriwdi qálegen jaslarǵa sharayatlar jaratıw sıyaqlı usınıslar bildirildi.

Institut rektorı usınday ilajlarǵa belsene qatnasqan studentlerge institut qarjıları esabınan bazalıq stipendiyanıń 50 procenti muǵdarında qosımsha ústeme tólemin tólew máselesin kórip shıǵatuǵınlıǵın málim etti.

Sonday-aq, ushırasıwda tarawda orın alıp atırǵan ayırım mashqalalar, olardıń sheshimleri boyınsha soraw-juwaplar ótkerilip, Ishki isler ministri A.Orınbaev bul baǵdarda bunnan keyin de studentler menen ashıq sáwbetlesiwlerdi dawam ettiriw zárúr ekenligin atap ótti hám juwapkerlerge óz usınısların bildirdi.

Ushırasıw sońında Ishki isler ministrligi, Jaslar isleri agentligi, institut hám basqa da birge islesiwshi shólkemler menen alıp barılatuǵın jumıslar kelisip alındı.

Islam Matekov,
NMPI baspasóz xatkeri.
Avtordıń túsirgen fotoları.