ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Test sınaǵı ushın tólem óndirilmeytuǵın abiturientler kategoriyası keńeydi

Kópshiliktiń xabarı bar, Prezidenttiń 2019-jıl 14-maydaǵı PQ-4319-sanlı qararı tiykarında test sınaqları shólkemlestirilip atırǵan oqıw jılınan aldınǵı jıllarda bilimlendiriw mákemelerin pitkergen abiturientlerden test sınaqlarında qatnasıwı ushın bazalıq esaplaw muǵdarınıń yarım esesi muǵdarında tólem óndiriledi.

Bunda tómendegi kategoriyadaǵı abiturientlerden tólem óndirilmeytuǵınlıǵı belgilengen edi:

— test sınaqları shólkemlestirilip atırǵan jılda bilimlendiriw mákemelerin pitkergen abiturientler;
— mayıplıǵı bolǵan adamlar;
— tolıq mámleketlik támiynattaǵı adamlar («Mehriybanlıq» úyi hám Balalar qalashasınıń pitkeriwshileri).

Mámleketlik test orayınıń xabar beriwinshe, Prezidenttiń 2022-jıl 20-apreldegi PF-113-sanlı pármanına muwapıq tómendegi 2 kategoriyadaǵı abiturientler de test sınaǵı ushın tólemnen azat etildi:

— «Sociallıq qorǵaw birden-bir reestri» málimleme sistemasında dizimge alınǵan adamlar hám olardıń perzentleri;
— «Jaslar dápteri»ne kirgizilgen jaslar.

Solay eken, 2022-jıl 1-iyunnan baslap usı 2 kategoriyadaǵı abiturientlerden de test sınaǵı ushın tólem óndirilmeydi.

Islam Matekov,
Qaraqalpaqstan xabar agentligi.