Búgin, 27-aprel kúni Ájiniyaz atındaǵı Nókis mámleketlik pedagogikalıq institutında qaraqalpaq ádebiyatınıń kórnekli wákili, belgili jazıwshı, shayır hám dilmash Uzaqbay Pirjanovtıń 85 jıllıǵına arnalǵan «Sózim xalıq awzında qalsa qayılman» atamasındaǵı respublikalıq ilimiy-ámeliy konferenciya bolıp ótti.
Konferenciyanı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov basqarıp bardı.
Ilajǵa Qaraqalpaqstan Jazıwshılar awqamınıń baslıǵı, Qaraqalpaqstan xalıq shayırı, Ózbekstan xalıq jazıwshısı K.Kárimov, Ózbekstan Jazıwshılar awqamınıń aǵzaları, belgili jazıwshılar Nuralı Qabul hám Sobir Umar, Ózbekstan Jurnalistleri dóretiwshilik awqamı Qaraqalpaqstan bólimi baslıǵı, belgili dilmash K.Reymov, belgili shayır Sh.Ayapov, Qaraqalpaqstan xalıq jazıwshısı A.Sultanov, U.Pirjanovtıń qızı Lira Pirjanova, sonday-aq, basqa da ádebiyatqa janı qumar dóretiwshiler, professor-oqıtıwshılar hám studentler qatnastı.
Talantlı shayır, jazıwshı hám dilmash Uzaqbay Pirjanov 1937-jıl Bozataw rayonı «Erkindárya» xojalıǵında dúnyaǵa kelgen. Ol Qaraqalpaq mámleketlik pedagogikalıq institutı (házirgi Ájiniyaz atındaǵı Nókis mámleketlik pedagogikalıq institutı) tariyx-filologiya fakultetinde oqıǵan. 1976-jıldan baslap burınǵı Awqam Jazıwshılar awqamınıń aǵzası bolǵan. Ol miynet jolı dawamında «Ámiwdárya» jurnalı, «Qaraqalpaqstan» baspası hám Qaraqalpaqstan teleradiokompaniyasında jetekshi redaktor lawazımlarında jumıs isledi.
Dóretiwshiniń poeziyalıq hám prozalıq shıǵarmaları «Muhabbat qosıǵı», «Súwret», «Onda báhár edi», «Gúzgi japıraqlar», «Qarda qalǵan izler», «Qızıl kendirdiń gúlleri», «Aqtal astındaǵı aqsham», «Apreldiń sońǵı aqshamı» hám t.b. atamalarda kitap bolıp baspadan shıqqan. Onıń dóretpeleri rus, gruzin, ázerbayjan, túrk, qazaq, qırǵız, tatar, bashqurt, qumıq, darǵın, avar tillerine awdarıldı.
Uzaqbay Pirjanov qaraqalpaq ádebiyatında sheber dilmash sıpatında óz ornına iye bolıp, «Ámir Temurdıń biylikleri», «Túrkler shejiresi», Shıńǵıs Aytmatovtıń derlik barlıq dóretpelerin, sonıń menen birge, Krishan Chandar, Stanislav Eji Lec, Mixail Bulgakov, Mixail Zoщenko, Grigoriy Baklanov, Yuriy Leontichev sıyaqlı belgili dóretiwshi tulǵalardıń shıǵarmaların qaraqalpaq tiline sheberlik penen awdarǵan.
Jazıwshı ómirlik joldası, belgili shayır Shiyrin Xalmuratova menen birgelikte ómir súrip, dóretiwshilik etti. Birgelikte bes perzentti dúnyaǵa keltirip, balaların kámalǵa keltirdi.
Konferenciyada filologiya ilimleriniń doktorı, professor K.Allambergenov «Uzaqbay Pirjanovtıń dóretiwshiliginde kóptúrlilik hám kórkemlik kórinisleri», pedagogika ilimleriniń kandidatı, docent A.Pazılov «U.Pirjanov prozasında tálim-tárbiya máseleleriniń kórkem sáwleleniwi», Qaraqalpaq mámleketlik universiteti qaraqalpaq ádebiyatı kafedrasınıń docenti, filologiya ilimleriniń kandidatı J.Sagidullaeva «U.Pirjanov povestlerinde stillik izlenisler» atamalarında bayanatlar jasadı.
Sonday-aq, ilaj dawamında miymanlar hám basqalar sózge shıǵıp, Uzaqbay Pirjanov dóretiwshiliginiń ózine tán ózgeshelikleri, awdarmashılıqtaǵı jetiskenlikleri, ómiri haqqında maǵlıwmatlar berdi.
Ilaj Qaraqalpaqstan kórkem óner sheberleri, instituttıń «Tumaris» xalıq ansambli hám talantlı studentlerdiń koncert baǵdarlaması, U.Pirjanov dóretiwshiligine arnalǵan poeziyalıq kórkem bólim menen dawam etti.
Konferenciya óz jumısın sekciyalarda dawam ettirdi.
NMPI baspasóz xızmeti.