Búgin, 28-aprel kúni Ájiniyaz atındaǵı Nókis mámleketlik pedagogikalıq institutında Ózbekstan Respublikası Prezidenti janındaǵı Mámleketlik xızmetti rawajlandırıw agentligi Qaraqalpaqstan Respublikası filialı wákilleri qatnasıwında seminar bolıp ótti.

Ilajdı institut rektorı B.Otemuratov basqarıp bardı.

Seminarǵa Ózbekstan Respublikası Prezidenti janındaǵı Mámleketlik xızmetti rawajlandırıw agentligi Qaraqalpaqstan Respublikası filialınıń baslıǵı S.Dániyarov, filial bas inspektorı Q.Seytniyazov, professor-oqıtıwshılar hám studentler qatnastı.

Seminarda agentliktiń alıp baratuǵın jumısları, maqseti hám wazıypaları haqqında maǵlıwmatlar berildi.

Atap ótilgenindey, agentlik tiykarınan milliy kadrlar rezervin qáliplestiriw, mámleketlik uyımlarda jumıs isleytuǵın basshı kadrlardıń tájiriybesin arttırıw, qánigeligin jetilistiriw jumısların alıp baradı.

Milliy kadrlar rezervi tájiriybeli kadrlar haqqındaǵı málimlemeni óz ishine alǵan, mámleketlik puqaralıq xızmeti basshı lawazımlarınıń tájiriybeli kadrlar menen toltırılıwın támiyinleytuǵın maǵlıwmatlar bazası ekenligi atap ótilip, bul mámleketlik sektorda basshı kadrlar quramın turaqlı támiyinlew hám onıń sapasın jaqsılaw, mámleketlik xızmetkerdiń kásiplik bilimin arttırıw jáne xızmetti lawazımı boyınsha kóteriw maqsetinde qáliplestiriletuǵınlıǵı haqqında maǵlıwmatlar berildi.

Sonday-aq, seminarda studentlerge mámleketlik uyımlarǵa jumısqa ornalasıw boyınsha Mámleketlik puqaralıq xızmetkerlerdiń vakant lawazımlarınıń birden-bir ashıq portalı – vacancy.argos.uz haqqında tolıq túsinikler berildi.

Seminarda Ózbekstan Respublikası Prezidenti janındaǵı Mámleketlik xızmetti rawajlandırıw agentligi Qaraqalpaqstan Respublikası filialınıń «Keleshek liderleri» klubı, onıń maqseti hám wazıypaları haqqında sóz etilip, instituttan usı klubqa aǵza bolǵan doktorant, magistrant hám studentler kópshilikke úlgi sıpatında atap kórsetildi.

Seminar soraw-juwaplar menen dawam etti.

NMPI baspasóz xızmeti.