Usı jıldıń 29-aprel kúni paytaxtımız Nókis qalasındaǵı oraylıq amfiteatrda Ájiniyaz atındaǵı Nókis mámleketlik pedagogikalıq institutınıń «Turan» komandası shólkemlestirilgenine 25 jıl tolıwına arnalǵan «Turan 25 jasta» atamasında institut fakultetleri arasında «Quwnaqlar hám ziyrekler» festivalı bolıp ótti.

Festivalǵa instituttıń Fizika-matematika, Súwretlew óneri hám texnologiyalıq tálim, Mektepke shekemgi tálim, Tariyx, Tábiyǵıy pánler, Pedagogika, Baslawısh tálim, Túrkiy tiller, Dene mádeniyatı, Shet tilleri fakultetleri, sonday-aq, miyman sıpatında Berdaq atındaǵı Qaraqalpaq mámleketlik universitetiniń «Jayhun» komandaları qatnastı.

Festivalda komandalar «Biz 25 jastamız» shárti boyınsha óz saxnalıq mádeniyatı, ziyrekligin kórsetti. Hár bir komanda ómirdiń altın máwriti esaplanǵan studentlik dáwirdegi qızıqlı waqıyalar, ózleri oqıp atırǵan tálim baǵdarı, kásibi hám onıń jámiyettegi áhmiyeti haqqında saxnalastırılǵan yumor-satiralıq shıǵıwların jıynalǵanlar názerine usındı.

Festivalǵa respublikalıq «Quwnaqlar hám ziyrekler» tańlawınıń birneshe márte chempionı, «Chempionlar kubogı» jeńimpazı «Turan» komandasınıń veteran aǵzaları, sonday-aq, estradamızdıń jarqın juldızları da qatnastı.

Ótkerilgen ilaj dawamında «Turan» komandasında oynap, jurtshılıqqa belgili bolǵan veteran qatnasıwshılarǵa, sonday-aq, komandanıń shólkemlestiriw hám basqa da jumıslarına jaqınnan járdem berip kiyatırǵan bir topar belsendilerge alǵısnamalar, estelik sawǵaları tapsırılǵan bolsa, festival juwmaǵında hár bir qatnasıwshı komandaǵa aqshalay sıylıqlar berildi.

Festivalǵa Qaraqalpaqstan Respublikası Ministrler Keńesi Baslıǵınıń orınbasarı A.Dániyarov qatnastı.

NMPI baspasóz xızmeti.