Búgin, 11-may kúni Ájiniyaz atındaǵı Nókis mámleketlik pedagogikalıq institutında «Baqsha – mektep – joqarı bilimlendiriw – kárxana» principi tiykarında shet tillerin oqıtıwdı en jaydırıw usılları» atamasındaǵı xalıqaralıq ilimiy-teoriyalıq konferenciya óz jumısın basladı.

Konferenciyanıń ashılıw plenarlıq májilisinde Nókis Prezident mektebiniń oqıtıwshısı Devid Keffer «The edX Online Learning Platform», Qazaqstan Respublikası L.N.Gumilyov atındaǵı Evraziya Milliy universitetinen filologiya ilimleriniń kandidatı, docent A.M.Abdixalikova «Multimedia technologies in foreign language teaching», AQSh mámleketinen «TESOL» treneri Yuta Otake «Categories have no limits», sonday-aq, NMPI studenti Q.Orazgalieva «Borrowing in the mediatext of the Karakalpak language» atamalarındaǵı bayanatların jasadı.

Xabarıńız bar, elimizde shet tillerin oqıtıwdıń kompleksli sisteması, yaǵnıy hár tárepleme jetik, oqımıslı, zamanagóy pikirleytuǵın jas áwladtı tárbiyalawda, respublikamızdıń dúnya jámiyetshiligine bunnan bılay da integraciyalasıwına baǵdarlanǵan sistema jaratıldı.

Mektepke shekemgi, ulıwma bilim beriw hám joqarı bilimlendiriw mákemeleri ushın shet tilleri boyınsha multimedialıq sabaqlıqlar, inglis tilin úyreniw boyınsha elektron resurslar tayarlandı, mektepler, orta arnawlı hám joqarı oqıw orınlarında lingafon kabinetleri úskenelendi.

Sonıń menen birge, shet tillerin úyreniwdi shólkemlestiriwdiń ámeldegi sistemasın analizlew nátiyjesinde, bilimlendiriw standartları, oqıw baǵdarlamaları hám sabaqlıqlar zaman talaplarına, atap aytqanda, aldınǵı málimleme hám media-texnologiyalardan paydalanıw baǵdarındaǵı talaplarǵa tolıq juwap bermey atır. Bilimlendiriw sistemasınıń barlıq basqıshlarında shet tillerin úzliksiz úyreniwdi shólkemlestiriw, sonday-aq, oqıtıwshılardıń qánigeligin jetilistiriw hám zamanagóy oqıw-metodikalıq materiallar menen támiyinlew bunnan bılay da jetilistiriwdi talap etpekte.

Konferenciyada islengen bayanatlarda zamanagóy onlayn oqıtıw platformaları, multimedialıq texnologiyalardı bilimlendiriwge keńnen engiziw boyınsha sırt el tájiriybeleri, olardan nátiyjeli paydalanıw usılları boyınsha pikirler hám usınıslar boldı.

Konferenciya óz jumısın sekciyalarda dawam ettirmekte.

Eki kún dawam etiwi belgilengen konferenciya erteń, 12-may kúni óz jumısın juwmaqlaydı.

NMPI baspasóz xızmeti.