Búgin, 17-may kúni Ájiniyaz atındaǵı Nókis mámleketlik pedagogikalıq institutı Túrkiy tiller fakulteti qazaq tili hám ádebiyatı kafedrasınıń shólkemlestiriwinde «Filologiyadaǵı fundamental izertlewler hám oqıtıwdıń innovaciyalıq imkaniyatları» atamasındaǵı xalıqaralıq ilimiy-teoriyalıq konferenciya óz jumısın basladı.

Konferenciyanıń ashılıw plenarlıq májilisine Qazaqstan Respublikasındaǵı bir qatar joqarı oqıw orınları, ilimiy-izertlew oraylarınan, sonday-aq, Ózbekstan hám Qaraqalpaqstandaǵı joqarı oqıw orınlarınan professor-oqıtıwshılar, doktorantlar, instituttıń magistrantları hám studentleri, sonıń menen birge, qazaq tili hám ádebiyatı kafedrası menen birge islesiw jumısların jolǵa qoyǵan Nókis qalası hám Xojeli rayonındaǵı mekteplerdiń jámááti qatnastı.

Konferenciyanı kafedra baslıǵı, filologiya ilimleri boyınsha filosofiya doktorı, docent Í.Quttımuratova basqarıp bardı.

Ilajda instituttıń ilimiy isler hám innovaciyalar boyınsha prorektorı M.Jalelov sózge shıǵıp, sońǵı jıllarda institutta professor-oqıtıwshılar, doktorantlar tárepinen ámelge asırılıp atırǵan ilimiy-izertlew jumıslarınıń nátiyjeleri haqqında aytıp ótti. Usı qatarda qazaq tili hám ádebiyatı boyınsha islenip atırǵan ilimiy jumıslar tuwralı sóz etip, konferenciyanıń jumıslarına tabıslar tiledi.

Konferenciyada Ál-Farabiy atındaǵı Qazaq Milliy universiteti qazaq tili hám ádebiyatı kafedrasınıń docenti, filologiya ilimleriniń kandidatı E.Pertaeva, Xalıqaralıq Taraz innovaciyalıq institutı qazaq tili hám ádebiyatı kafedrasınıń baslıǵı, filologiya ilimleriniń kandidatı R.Berkenova, M.X.Dulatiy atındaǵı Taraz regionallıq universiteti qazaq tili hám ádebiyatı kafedrasınıń docenti, filologiya ilimleriniń kandidatı A.Karibaeva, Xalıqaralıq Taraz innovaciyalıq institutı, qazaq tili hám ádebiyatı kafedrasınıń aǵa oqıtıwshısı, pedagogika ilimleriniń magistri B.Stamqulova, Xoja Axmet Yassawiy atındaǵı Xalıqaralıq qazaq-túrk universiteti qazaq filologiyası kafedrasınıń oqıtıwshısı, filologiya ilimleriniń kandidatı I.Dosbol, Nızamiy atındaǵı Tashkent mámleketlik pedagogikalıq universiteti qazaq tili hám ádebiyatı kafedrasınıń baslıǵı, pedagogika ilimleriniń doktorı, professor E.Abduvalitov XVIII-XIX ásirdegi qazaq ádebiyatı, qazaq balalar dramaturgiyasınıń qáliplesiwi hám rawajlanıwı, qazaq tilindegi terminlerdiń qollanılıw ózgeshelikleri, M.Áwezov dóretiwshiligi, sanlı texnologiyalardı innovaciyalıq bilimlendiriwge engiziw, túrkiy xalıqlar lirikasındaǵı túrkiyshilikti jırlawdaǵı metaforalıq oydıń baylanıslılıǵı boyınsha, sonday-aq, Berdaq atındaǵı Qaraqalpaq mámleketlik universiteti qaraqalpaq til bilimi kafedrasınıń professorı, filologiya ilimleriniń doktorı Sh.Abdinazimov, Ájiniyaz atındaǵı Nókis mámleketlik pedagogikalıq institutı qaraqalpaq ádebiyatı kafedrasınıń baslıǵı, filologiya ilimleriniń doktorı, professor K.Allambergenov, instituttıń ózbek tili kafedrasınıń professorı, filologiya ilimleriniń doktorı Yu.Ibragimovlar qaraqalpaq til biliminiń rawajlanıw baǵdarları, jaslardı watansúyiwshilik ruwxında tárbiyalawda túrkiy tilles xalıqlardıń ortaq mádeniy miyraslarınıń ornı hám usı mazmundaǵı bayanatların jasadı.

Ilajda jasalǵan bayanatlarda qazaq, qaraqalpaq hám ózbek xalıqlarınıń til bilimi, ádebiyatı boyınsha baylanısları, mazmunlıq, tematikalıq jaqtan bir-birine únlesligi, birgelikte ámelge asırılıp atırǵan ilimiy-izertlew hám ilimiy-pedagogikalıq jumıslar, olardı bunnan bılay da bekkemlew boyınsha pikir-usınıslar bildirildi.

Konferenciyanıń ashılıw plenarlıq májilisinen soń instituttıń «Tumaris» xalıq ansambli, «Sıy perde» duwtarshılar ansambli, qazaq tili hám ádebiyatı tálim baǵdarınıń talantlı studentleri, mekteplerdiń oqıwshıları, sonday-aq, elimizge belgili kórkem óner sheberleriniń atqarıwındaǵı kórkem-ádebiy bólim hám koncert baǵdarlaması qatnasıwshılar itibarına usınıldı.

Koncert baǵdarlamasınan soń ashılıw plenarlıq májilisinde óz bayanatları menen qatnasqan professorlar hám miymanlarǵa diplomlar, estelik sawǵaları tapsırıldı.

Konferenciya óz jumısın sekciyalar boyınsha dawam ettirdi.

Ilaj erteń, 18-may kúni juwmaqlanıwı belgilengen.

NMPI baspasóz xızmeti.