Búgin, 17-may kúni Koreya Respublikasınıń Ózbekstandaǵı ayrıqsha hám tolıq huqıqlı elshisi Kim Xi Sang Ájiniyaz atındaǵı Nókis mámleketlik pedagogikalıq institutına keldi.

Institutta Koreya Respublikasınıń Ózbekstandaǵı Elshixanası menen birgelikte shólkemlestirilgen «Koreya múyeshi»nde institut rektorı B.Otemuratov, instituttıń koreys tili páni oqıtıwshısı, Qaraqalpaqstandaǵı Koreys milliy mádeniy orayınıń baslıǵı M.Kogay menen bolıp ótken sáwbetlesiw barısında Qaraqalpaqstanda koreys tilin úyreniw boyınsha ámelge asırılıp atırǵan jumıslar haqqında maǵlıwmatlar berildi.

Kóp milletli Qaraqalpaqstanda búgingi kúnde jumıs alıp barıp atırǵan milliy mádeniy oraylar qatarında Koreys milliy mádeniy orayınıń jumısları ayrıqsha bolıp esaplanadı. Institutta usı oray menen tıǵız birge islesiw jumısları jolǵa qoyılǵan bolıp, shet tilleri baǵdarında oqıp atırǵan studentlerine ekinshi shet tili sıpatında koreys tilin oqıtıw jolǵa qoyılǵan.

Elshi mırza instituttaǵı «Koreya múyeshi» Qaraqalpaqstanda koreys tilin úyretiw boyınsha tiykarǵı oray wazıypasın atqarıp atırǵanlıǵı haqqında unamlı pikirlerin bildirip, Koreya xalıqaralıq birge islesiw agentligi – «KOICA» joybarları sheńberinde koreys tilin úyretiw boyınsha pandemiya sebepli biraz waqıt toqtap qalǵan volontyorlıq jumısların qayta jolǵa qoyıw boyınsha usınıslar beriletuǵınlıǵın málim etti.

Sonıń menen birge, sáwbetlesiw dawamında Qaraqalpaqstan Respublikasında koreys tili boyınsha xalıqaralıq sertifikat beriletuǵın oray ashıw boyınsha usınıslar bildirilip, bul baǵdarda aldaǵı wazıypalar belgilep alındı.

Ilajda instituttıń talantlı studentleri tárepinen qaraqalpaq jırawshılıq hám baqsıshılıq óneri úlgileri, Koreys milliy mádeniy orayı aǵzalarınıń koreys xalıq saz ásbaplarında milliy saz jáne qosıqlardı atqarıwı ushırasıwǵa ózgeshe payız baǵıshladı.

Ilajǵa Qaraqalpaqstan Respublikası Ministrler Keńesi Baslıǵınıń orınbasarı R.Saparbaev qatnastı.

NMPI baspasóz xızmeti.