Búgin, 20-may kúni Ájiniyaz atındaǵı Nókis mámleketlik pedagogikalıq institutınıń sport sarayında bıyılǵı oqıw jılı dawamında institut fakultetleri arasında ótkerilgen «Universiada-2022» sport jarıslarınıń jeńimpazların sıylıqlaw saltanatı bolıp ótti.

Ilajda institut rektorı Bayrambay Otemuratov sózge shıǵıp, institutta studentler arasında salamat turmıs tárizin en jaydırıw, sabaqlardan bos waqıtların sport-salamatlıq ilajlarına baǵdarlaw, institut saylandı komandaları ushın kadrlar rezervin qáliplestiriw maqsetinde hár jıl sayın turaqlı túrde ótkerilip kiyatırǵan usı jarıslardıń áhmiyeti haqqında toqtalıp ótti. Sonıń menen birge, jarıslarǵa belsene qatnasqan, jeńimpaz bolǵan hám sıylı orınlardı iyelegen student-jaslardı institut qarjıları esabınan Buxara hám Samarqand qalalarına sayaxatqa jiberiletuǵınlıǵın málim etti.

Erler hám hayal-qızlar arasında sporttıń basketbol, voleybol, gandbol, futbol, badminton, stol tennisi, jeńil atletika shaxmat hám shashka túrleri boyınsha ótkerilgen jarıslarda ulıwma komandalıq esapta Fizika-matematika fakultetiniń studentleri sıylı 1-orındı iyeledi.

Bunnan keyingi orınlardı sáykes túrde Tariyx hám Mektepke shekemgi tálim fakultetleri bántledi.

Ulıwma komandalıq esapta kúshli úshlikten orın alǵan fakultetlerge kubok, medal, diplom hám sawǵalar tapsırıldı.

Sonday-aq, ilajda jarıslarda sıylı orınlardı iyelegen hám jeńimpaz bolǵan studentler, jarıslardı shólkemlestiriwde belsendilik kórsetken professor-oqıtıwshılar múnásip xoshametlendi.

NMPI baspasóz xızmeti.