Usı jıldıń 25-27-may kúnleri Rossiya Federaciyasındaǵı Qazan federal universitetinde «XXI ásirde oqıtıwshınıń bilimin, qánigeligin jetilistiriw hám densawlıǵın saqlaw» atamasında pedagogikalıq bilimlendiriw boyınsha VIII Xalıqaralıq forum (International Forum on Teacher Education – IFTE) bolıp ótti.

Keń masshtabda ótkerilgen ilajǵa 30 ǵa shamalas mámleketlerden ilimpazlar, joqarı oqıw orınları, ilimiy-izertlew oraylarınıń basshıları hám wákillerinen ibarat delegaciyalar qatnastı.

Forum sheńberinde Ájiniyaz atındaǵı Nókis mámleketlik pedagogikalıq institutı rektorı Bayrambay Otemuratov basshılıǵındaǵı delegaciya aǵzaları Qazan federal universitetinde boldı.

Institut delegaciyası universitet infrastrukturası menen tanısıp, «Biz birgemiz» balalar baqshası, universitet tariyxı muzeyin kózden ótkerdi.

Universitettiń sırtqı baylanıslar boyınsha prorektorı Timirxan Alishev penen bolǵan ushırasıwda eki tárepleme birge islesiw máseleleri dodalandı.

Qazan federal universitetiniń tiykarǵı baǵdarları biomedicina, geologiya hám neft-gaz texnologiyaları, materialtanıw, sanlı texnologiyalar hám pedagogika bolıp, prorektor T.Alishev institut delegaciyasına hár bir baslı baǵdar boyınsha ámelge asırılıp atırǵan jumıslar haqqında maǵlıwmatlar berdi.

Óz gezeginde, Nókis mámleketlik pedagogikalıq institutı rektorı B.Otemuratov Qaraqalpaqstan hám Ózbekstanda pedagog kadrlar tayarlawda instituttıń tutqan ornı, búgingi kúnde tarawda ámelge asırılıp atırǵan reformalardıń nátiyjeleri, aldaǵı waqıtlarda birge islesiw baǵdarları haqqında atap ótti.

Ushırasıw barısında fizika, ximiya hám biologiya boyınsha professor-oqıtıwshılar almasıw máselesine qızıǵıwshılıq bildirilip, aldaǵı ámeliy jumıslar kelisip alındı.

Ilaj sońında eki joqarı oqıw ornı arasında birge islesiw boyınsha hújjetlerge qol qoyıldı.

NMPI baspasóz xızmeti.