Usı jıldıń 24-31-may kúnleri aralıǵında Jizzaq wálayatında sporttıń voleybol túri boyınsha ótkerilgen XXIX Ózbekstan chempionatında Qaraqalpaqstan Respublikasınıń Ájiniyaz atındaǵı Nókis mámleketlik pedagogikalıq institutı qızlar saylandı komandası ulıwma 58 upay menen jeńimpaz bolǵanı haqqında xabar bergen edik.

Búgin, 1-iyun kúni erte tańda Nókis temir jol vokzalında jeńimpaz komanda aǵzaları saltanatlı túrde kútip alındı.

Ilajǵa institut jámááti, Qaraqalpaqstan Respublikası Sporttı rawajlandırıw ministrligi wákilleri, professor-oqıtıwshılar, tyutorlar, sportshılardıń dosları, jaqın aǵayin-tuwısqanları, keń jámiyetshilik hám ǵalaba xabar quralları wákilleri qatnastı.

Onda sózge shıqqanlar sportshılardı erisken tabısları menen qutlıqlap, aldaǵı bolıp ótetuǵın respublika, Aziya kólemindegi jarıslarda áwmetler tiledi.

Óz gezeginde, komanda bas treneri Azat Kazakov hám voleybolshı qızlar sózge shıǵıp, jaratılıp atırǵan barlıq imkaniyatlar, sharayatlardan minnetdar ekenligi, xalqımızdıń isenimin aqlap, bunnan da joqarı sheklerge qaray háreket etetuǵınlıǵın atap ótti.

NMPI baspasóz xızmeti.