ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Oqıw procesinde korrupciyalıq jaǵdaylardıń aldın alıw maqsetinde qanday jumıslar ámelge asırılmaqta?

Ózbekstan Respublikası Prezidentiniń «Ózbekstan Respublikası joqarı bilimlendiriw sistemasın 2030-jılǵa shekem rawajlandırıw koncepciyasın tastıyıqlaw haqqında»ǵı pármanı, «Joqarı hám orta arnawlı bilimlendiriw sistemasına basqarıwdıń jańa principlerin engiziw ilajları haqqında»ǵı qararı, sonday-aq, Ózbekstan Respublikası Joqarı hám orta arnawlı bilimlendiriw ministriniń buyrıǵı jáne basqa da normativlik-huqıqıy hújjetler tiykarında Ájiniyaz atındaǵı Nókis mámleketlik pedagogikalıq institutında 2021-jıldıń sentyabr ayında Korrupciyaǵa qarsı gúresiw «Komplaens-qadaǵalaw» sistemasın basqarıw bólimi shólkemlestirilgen edi.

Bólimniń tiykarǵı wazıypası tarawda korrupciyanıń aldın alıw, oǵan qarsı gúresiw baǵdarındaǵı jumıslardı islep shıǵıw hám alıp barıw, korrupciyaǵa baylanıslı huqıqbuzarlıqlardıń sistemalı sebepleri jáne aqıbetlerin saplastırıw, institut jámááti, professor-oqıtıwshılar hám studentlerdiń huqıqıy sanası menen mádeniyatın arttırıwǵa baǵdarlanǵan kompleksli jumıslardı ámelge asırıwdan ibarat bolıp esaplanadı.

Házirgi waqıtta jazǵı sessiya waqtında korrupciyalıq jaǵdaylarǵa jol qoymaw, juwmaqlawshı mámleketlik attestaciya hám pánlerden juwmaqlawshı imtixanlardıń ádil ótkeriliwin támiyinlew maqsetinde institutta bir qatar jumıslar ámelge asırılmaqta.

Atap aytqanda, instituttıń barlıq oqıw imaratları hám fakultetlerge, auditoriyalarǵa korrupciyalıq jaǵdaylardıń aldın alıw boyınsha úgit-násiyat bannerleri, usınday jaǵdaylarǵa dus kelgende qay jerge múrájat etiw zárúrligi, isenim telefonları kórsetilgen infoplakatlar qıstırıldı.

Sonıń menen birge, instituttıń Korrupciyaǵa qarsı gúresiw «Komplaens-qadaǵalaw» sistemasın basqarıw bólimi baslıǵı P.Xojabekovtıń professor-oqıtıwshılar, studentler, tyutorlar hám barlıq xızmetkerlerge jollaǵan videomúrájatı instituttıń barlıq fakultetleri, bólimleri, studentlerdiń sociallıq tarmaqlar hám messendjerlerdegi toparlarına tarqatıldı.

Imtixanlarda qatnasatuǵın studentlerdiń kópshiligi menen tikkeley joqarıdaǵı máseleler boyınsha sáwbetlesiwler ótkerildi.

Sonday-aq, instituttıń tiyisli bólimleri hám taraw wákilleri menen birgelikte hár bir fakultet kesiminde imtixanlar ótkerilip atırǵan auditoriyalarda baqlaw hám úyreniw jumısları alıp barılıwı jolǵa qoyılǵan.

Jáne qosımsha etiw orınlı, imtixanlar ótkeriletuǵın zamanagóy úskenelengen auditoriyalarda baqlaw kameralarınan paydalanıw hám mikrofonlar ornatıw boyınsha ámeliy jumıslardı alıp barıw jobalastırılǵan.

NMPI baspasóz xızmeti.