Ájiniyaz atındaǵı Nókis mámleketlik pedagogikalıq institutında 2021-2022-oqıw jılında pitkeriwshi kurs studentleriniń qánigelik pánlerden mámleketlik attestaciyalıq sınaqları hám pitkeriw qánigelik jumısları qorǵawı baslandı.

Juwmaqlanıw aldında turǵan bıyılǵı oqıw jılında instituttı bakalavriattıń kúndizgi bilimlendiriw baǵdarları boyınsha 1739, ekinshi qánigelik boyınsha 37 hám magistratura qánigelikleri boyınsha 357 student pitkeriwi kútilmekte.

Túrkiy tiller fakultetinde pitkeriwshi kurs studentleriniń pitkeriw qánigelik jumısları qorǵawına instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov qatnasıp, studentlerge kelesi jumıslarında tabıslar tiledi.

— Biziń basqa joqarı oqıw orınlarınan baslı ózgesheligimiz – insan tárbiyası menen shuǵıllanıwshı pedagoglar, ustazlar, muǵallimler hám oqıtıwshılar, sonday-aq, tárbiyashılardı tayarlawdan ibarat. Sizler endi usınday ullı kásiptiń mamanı bolıw qarsańındasız. Aldıńızda úlken gúzar jol kútpekte. Bul jolda bársheńizge úlken tabıslar, jańadan-jańa jetiskenlikler tileymen,-dedi prorektor.

Sonday-aq, pitkeriwshi studentlerge múrájat etip, ayırım jaslar tárepinen imtixanlar yamasa qorǵaw jumıslarınan keyin hár qıylı unamsız háreketlerdi ámelge asırıp, kópshiliktiń kúlkisine hám bazda ǵázebine duwshar bolıp atırǵanı, keleshekte ustazday ullı kásip iyeleri bolatuǵın institut pitkeriwshilerine bunday háreketler jaraspaytuǵını, olar bárqulla basqalardan bir qádem aldında bolıp, kópshiliktiń háwesin keltirip júretuǵın jaslar bolıwı kerekligin atap ótti.

Pitkeriwshi kurs studentleri bildirilgen tileklerden minnetdar bolıp, keleshekte elimizdiń rawajlanıwına múnásip úlesin qosa alatuǵın áwlad tárbiyasında bar kúsh-jigerin, intellektual potencialın jumsawǵa háreket etetuǵınlıǵın bildirdi.

NMPI baspasóz xızmeti.