Ózbekstan Respublikası Prezidentiniń «Mámleketlik joqarı bilimlendiriw mákemelerine oqıwǵa qabıllaw processlerin shólkemlestiriw haqqında»ǵı qararına muwapıq, «2022-2023-oqıw jılında Ózbekstan Respublikasınıń joqarı bilimlendiriw mákemelerine oqıwǵa qabıllawdıń mámleketlik buyırtpası parametrleri haqqında»ǵı biyligi qabıl etildi.

Oǵan bola, oqıwǵa qabıllawdıń mámleketlik buyırtpası parametrleriniń ulıwmalıq kvotası 121 295 orın etip belgilendi.

Sonnan, bakalavriat bilimlendiriw baǵdarlarına – 110 707 orın, yaǵnıy:
Kúndizgi bilimlendiriw túrine – 77 477 orın;
Sırtqı bilimlendiriw túrine – 26 095 orın;
Keshki bilimlendiriw túrine – 3 725 orın;
Aralıqtan bilimlendiriw túrine – 10 688 orın;

Magistratura qánigeliklerine – 10 688 orın.

Sonday-aq, finanslıq ǵárezsizlik berilgen 36 mámleketlik joqarı oqıw orınlarınıń tólemli kontrakt boyınsha jáne 50 mıńnan aslam qabıllaw parametrleri Baqlaw keńesleriniń qararı menen tastıyıqlanıwı jobalastırılǵan. Nátiyjede bıyılǵı oqıw jılında qabıllaw parametrleri ótken jılǵa salıstırǵanda artadı.

Hújjet tiykarında, 2022-2023-oqıw jılınan baslap mámleketlik joqarı oqıw orınlarında:

— oqıwǵa qabıllawdıń mámleketlik buyırtpası parametrleri Prezident biyligine muwapıq tastıyıqlanadı;

— bakalavriat baǵdarları boyınsha aralıqtan bilimlendiriw túri engiziledi.

2022-2023-oqıw jılı ushın respublikalıq joqarı oqıw orınlarına abiturient sıpatında dizimnen ótiw processleri 2022-jıl 20-iyunnan 20-iyul kúni (sol kúni de) aralıǵında bolıp ótedi.

Bunda onlayn tárizde dizimnen ótiw:

— Birden-bir interaktiv mámleketlik xızmetler portalı (my.gov.uz);
— Mámleketlik test orayınıń rásmiy veb-saytı (dtm.uz) arqalı ámelge asırıladı.

Shet tili páninen kásiplik (dóretiwshilik) imtixan ótkeriletuǵın bilimlendiriw baǵdarlarına onlayn dizimnen ótiw 10-iyulǵa shekem (sol kúni de) ámelge asırıladı.

Sonday-aq, qararǵa muwapıq abiturientlerge:

— test sınaǵı tapsırılatuǵın pánler kompleksi hám izbe-izligi birdey bolǵan besewge shekemgi bakalavriat bilimlendiriw baǵdarların, sonday-aq, bir waqıttıń ózinde barlıq bilimlendiriw túrlerin (kúndizgi, sırtqı, keshki, aralıqtan bilimlendiriw) tańlaw huqıqı beriledi;

— dizimnen ótiw procesinde tańlanǵan bakalavriat bilimlendiriw baǵdarlarınıń ústinligine qaray dáslep mámleketlik grant, keyin ala tólemli kontrakt tiykarında tańlawda qatnasıw imkaniyatı beriledi.

Sonıń menen birge, bunnan bılay joqarı oqıw orınlarına imtixanlarsız mámleketlik grant tiykarında oqıwǵa kiriw boyınsha jeńillikke iye bolǵan adamlar ulıwmalıq qabıllaw parametrlerinen tısqarı qosımsha mámleketlik grant tiykarında oqıwǵa qabıl etiledi.

Aldın jeńillikke iye bolǵan ayırım abiturientler ulıwmalıq kvota sheńberindegi mámleketlik grant tiykarında oqıwǵa qabıllanatuǵın hám ajıratılǵan grant orınların bántleytuǵın edi.

2023-2024-oqıw jılınan baslap mámleketlik joqarı oqıw orınlarına oqıwǵa qabıllawdıń mámleketlik buyırtpası parametrleri tek ǵana mámleketlik grant boyınsha tastıyıqlanadı.

Islam Matekov,
NMPI baspasóz xatkeri.