Ózbekstan Respublikası Prezidentiniń «Mámleketlik joqarı bilimlendiriw mákemelerine oqıwǵa qabıllaw processlerin shólkemlestiriw haqqında»ǵı qararı qabıl etildi.

Hújjet tiykarında, 2022-2023-oqıw jılınan baslap mámleketlik joqarı oqıw orınlarında:

— oqıwǵa qabıllawdıń mámleketlik buyırtpası parametrleri Prezident biyligine muwapıq tastıyıqlanadı;

— magistraturaǵa qabıllaw abiturienttiń bakalavriat diplom balınıń ortasha kórsetkishi hám shet tilin biliw dárejesi boyınsha tiyisli milliy yamasa xalıqaralıq sertifikat tiykarında ámelge asırıladı, qánigelik páninen imtixan ótkerilmeydi.

Bunda magistraturaǵa qabıllaw bir jılda eki márte – avgust hám yanvar aylarında shólkemlestiriledi.

Yaǵnıy:

— avgust ayındaǵı qabıllaw – gezektegi oqıw jılı ushın tastıyıqlanǵan mámleketlik grant hám tólemli kontrakt tiykarındaǵı kvotalar ushın;
— yanvart ayındaǵı qabıllaw – jazda tolmay qalǵan orınlar hám Mámleketlik qabıllaw komissiyası tárepinen tastıyıqlanǵan kontrakt tiykarındaǵı qosımsha kvotalar ushın boladı.

Usı qararǵa muwapıq, bunnan bılay mámleketlik joqarı oqıw orınlarınıń magistraturasına oqıwǵa kirgen barlıq hayal-qızlardıń tólemli kontrakt muǵdarları mámleketlik byudjet qarjıları esabınan qaplanadı.

Bunda:

— 2021-2022-oqıw jılında mámleketlik joqarı oqıw orınlarınıń magistraturasına studentlikke qabıl etilip, tólemli kontrakt tiykarında oqıp atırǵan hayal-qızlardıń 2022-2023-oqıw jılı ushın tólemli kontrakt muǵdarı;

— 2022-2023-oqıw jılınan baslap mámleketlik joqarı oqıw orınlarınıń magistraturasına ajıratılǵan qabıllaw parametrleri sheńberinde bazalıq tólemli kontrakt tiykarında studentlikke qabıl etilgen hayal-qızlardıń tólemli kontrakt muǵdarı qaplap beriledi.

2023-2024-oqıw jılınan baslap mámleketlik joqarı oqıw orınlarına oqıwǵa qabıllawdıń mámleketlik buyırtpası parametrleri tek ǵana mámleketlik grant boyınsha tastıyıqlanadı.

Islam Matekov,
NMPI baspasóz xatkeri.